گود سبور//

مع الأسف مازال الرأي العام الرياضي المغربي، كايتسرح واللي جا نشر شي إشاعة كايتبعوه الآلاف بلا ما يتأكدو من مصدر المعلومة ديالو، وواش صحيحة ولا غالطة.

وبعد التخربيق ديال الفوطات د گوال نيجيريا وبعدها السنغال فالفينال اللي الجمهور بقى كايقول بللي فيها السحور، وهاد التخربيق اللي تسرب للاعبين د المنتخب الوطني المغربي وحتى هما ولاو مقابلينو، ونظرية المؤامرة اللي انتشرت بعد تضييع ابراهيم للبينالتي فالفينال وأنه ضيعها بلعاني باش ما كيبرش المشكل بين المغرب والسنغال حيث لاعبين المنتخب السنغالي بغاو ينساحبو، وإشاعة وفاة عامل فالتران بسبب الشغب اللي داروه جمهور السنغال فالفينال، واللي نفاتها المديرية العامة للأمن الوطني، وأكدت أن كاع اللي توعتو تعالجو وخرجو من السبيطار، خرجت هذه المرة إشاعة جديدة، وهي أن عدد من لاعبين المنتخب الوطني المغربي حيدو المتابعة من الحساب ديال الركراكي فإنستغرام.

وقاليك حگا ما حگا أشرف حكيمي وابراهيم دياز ونصير مزراوي ناضو حيدو أبوني للناخب الوطني وليد الركراكي من إنستغرام، وحگا ما حگا راهم مكاعيين معه، وما بقاش عاجبهم الحال يبقى مدرب ديالهم فالمنتخب الوطني وساعتو سالات بعد خسارة نهائي كاس إفريقيا مع السنغال، وطبعا هذا الشي ما كاينش وتخربيق وحسب المعطيات اللي كاينة فهاد اللاعبين ما كانوش مأبونيين فالگونط ديال الركراكي على انستغرام، ومن الفوق راه الكابيتان اشرف حكيمي نشر غير قبل منها بيوم رسالة شكر للمغاربة ومن بين الناس اللي شكر، الناخب الوطني وليد الركراكي.

ومع الأسف راه الجمهور وبقلة الوعي اللي عند بزاف من الفئات ديالو، ولى الواد اللي جا يديه واللي جا يسرحو بالإشاعات، وبلا ما نهضرو على الذباب الإلكتروني البراني، بحال الجزائريين اللي باغيين يورطو الجماهير المغربية فالعنصرية تجاه خوتهم أفارقة جنوب الصحرا وعلى راسهم السنغاليين مستغلين خسارة المنتخب المغربي لكاس افريقيا امام السنغال، وهذا الشي كامل لنسف العمل الكبيرة اللي دارو المغرب سنوات هادي على المستوى الافريقي والشركاء ديالو الافارقة.