وكالات//

رُكّاب واحد التران فسان فرانسيسكو تخلعو بزّاف منين بان ليهم الشيفور ناعس والقطار داير واحد المنعراج بسرعة ديال 80 كيلومتر فالساعة، قبل ما يوقف فجأة. من بعد الحادث، السائق قال: “ما صدمناش، ارتاحو.”

فبلاغ لوكالة النقل ديال المدينة، قالو بلّي التران اللي فيه جوج ديال العربات عرف سلسلة ديال الهزّات المفاجئة منين خرج من نفق الغروب حدا حديقة دوبوس، وطيحو شي ركّاب اللي تزاحمو وبغاو يهربو لجهة من جهات القطار.

فواحد الفيديو اللي حصلات عليه قناة KRON، باين الشيفور طايح ورا الكيدون قبل ما يفيق ويحاول يرجّع السيطرة على القطار.

الهيئة أكّدت بلّي ما كان حتى خروج على السّكة، ونظام الفرانات خدام مزيان، وفرق الطوارئ وصلات بلّاصة الحادث دغيا.

التحقيق الداخلي اللي داروه من بعد بيّن بلّي السبب هو “العيا ديال الشيفور”، وما كان حتى مشكل ميكانيكي لا فالقطار لا فالسّكة. وزادو قالو بلّي الشيفور تحطّ فحالة “ما يسوقش” حسب البروتوكولات ديالهم.

الركّاب حكاو لحظات الرّعب اللي عاشوها، وحدة منهم قالت فتصريح لمواقع محلّية: “حسّيت بحالي غادي نموت، هادي هي النهاية”، ووحد آخر قال بلّي الحادث “مخيف بزّاف، وطاحو عليّا الناس ملي دار القطار ف المنعرج”.