كود سبور//

عبرت مكونات المنتخب الوطني المغربي لكرة القدم لاقل من 17 عام على الشكر ديالها للملك محمد السادس على الاهتمام ديالو بالرياضة والكورة، ولرئيس الجامعة الملكية المغربية فوزي القجع على الإمكانيات المتوفرة، وهذا الشي اللي كان من اسباب الإنجاز اللي حققو فمونديال U17، والوصول ديالهم إلى ثمن نهائي المسابقة.

وتحدث حمزة ايت بودلال كابيتان الأشبال خلال حفل استقبالهم الجامعة من طرف الجامعة الملكية المغربية لكرة القدم، وقال: كنشكر سيدنا، ورئيس الجامعة الملكية المغربية لكرة القدم فوزي لقجع وكاع المدربين وجميع الناس اللي كانو كيتقاتلو معنا خارج التيران وكنشكر صحابي اللاعبين كاملين على المحهودات والقتالية ديالهم فالتيران ومزال الخير فالمستقبل”.

سعيد شيبا مدرب المنتخب المغربي لاقل من 17 حتى هو خدا الكلمة فالحفل، وقال: “تجربة المونديال هي فريدة وهذه الكروب كان سباق لهذا الإنجاز فهاد الفئة ديال اقل من 17 عام، وكنشكرو سيدنا على الاهتمام ديالو بالرياضة والرياضيين وكرة القدم بصفة خاصة، وكنشكرو رئيس الجامعة فوزي لقجع على الإمكانيات المتوفرة والظروف اللي حضرنا فيها طيلة هاد العامين”.

وكمل سعيد شيبا: “اللاعبين قدرو هذه الإمكانيات واستغلوها ووجدو وخدموا مزيان، تعذبو شويا فمراحل من هذا المسار ولكن فنهاية المطاف كانت النتائج وداكشي على هذه الدروس خاصنا ناخدوها معنا إلى المرحلة الجاية حيث هذه المشاركات هي محطات فمسيرة اللاعبين وخاصنا ناخدو معنا هذه التجارب إلى المحطة المقبلة ديال U20 والمراحل الأخرى اللي غتعاونهم باش يديرو كاريير احترافية”.

واكد الناخب الوطني: “اللاعبين كانوا مثال ديال الشاب المغربي المتخلق والمربي وهذا اول حاجة عاد المجال الرياضي اللي بينتو بلي عندكم امكانيات اللي تخليكم ديرو كاريير كبيرة فالكورة”.