كود ـ سبور//

عبر الناخب الوطني سعيد شيبا على الفرحة ديالو بتأهل المنتخب الوطني المغربي لأقل من 17 عام، إلى ربع نهائي مونديالU17، على حساب إيران بضربات الترجيح، وعلى الافتخار ديالو باللاعبين واستغل الفرصة باش يرد على المنتقدين بطريقة لبقة.

وتحدث سعيد شيبا بعد تأهل المنتخب المغربي وقال: “الوليدات كيستاهلو تحية كبيرة منا بالنضج الكبير اللي بينو اليوم وكنا عارفين الماتش صعيب وفهاد السن صعيب يلتازمو بواحد لبلان ديال اللعب قاسي عليهم وحتى بدنيا مع مرور الوقت، وكان علينا الصمود ونبقاو منظمين، ومع نهاية الشوط الثاني سيطرنا على الماتش بالاستحواذ على الكورة والوصول ولكن ما قدناش نقتلو المباراة اللي تسجل علينا فيها هدف ولكن زاد تأكد لينا القوة الذهينة اللي عند لكروب ديالنا وفهاد السن ديال 16 و17 عام”.

وهنأ شيبا الجماهير المغربية ورد على المنتقدين للاختيارات ديالو وقال: “كنباركو لكاع المغاربة يستحقو هذا الرباح واللاعبين والعائلات ديالهم.. الضغط خاصنا نتحملوه حنا ونحيدوه على اللاعبين داكشي علاش شفناهم متحررين والواجب ديالنا والأجر اللي كنتقاضواه كيفرض علينا ناخدو الحاجات الخايبة فالكورة بحال الانتقادات الخاوية والضغوطات وكلام فارغ ونخليو اللاعبين بعاد على هذا الشي ونعطيوهم الثقة وهذا جزء من المهنة ما كنخافوش منو واخا كنديرو مهنة صعيبة شوية ومجال كورة القدم اللي للأسف الجميع كيفهم فيه وخاصك تتحمل هذا الجزء من المهنة باش تستحق هاد فترات الفرح”.

وبخصوص ربع النهائي ضد مالي قال شيبا: “الماتش الجاي غيكون بنفس التوج والأفكار مع خصم اللي مختلف بامكانيات مختلفة وبتحضيرات مختلفة ونتمناو الوليدات يرتاحو مزيان فهاد الثلاثة ايام، ونتمناو نكونو موفقين فالاختيارات وما يكون غير الخير”.