كود سبور//

عبر الناخب الوطني سعيد شيبا على الفرحة ديالو حيث المنتخب الوطني المغربي لاقل من 17 عام تأهل إلى ثمن نهائي كاس العالم بعدما ربح اليوم الخميس البلد المستضيف إندونيسيا بنتيجة 3 لواحد، واكد ان اللاعبين والطاقم التقني فليكيب ناسوينال دايرين خدمة كبيرة باش المنتخب يوصل لأبعد نقطة.

وتحدث سعيد شيبا بعد التأهل وقال فتصريح له: “فرحانين بالتأهل ديالنا إلى ثمن نهائي المونديال وهذا كان هو الهدف الاول ديالنا من هذه المشاركة وبالثبات على المستوى حيث بغض النظر على النتائج الفوز ديالنا على باناما والخسارة مع الإكوادور والرباح اليوم على إندونيسيا خلانا محافظين على النمط فالتنظيم والقدرة فالتدبير وهذا الشي كان اليوم اكثر ورائع”.

ووضح شيبا: “خلينا اللاعبين يوعاو انهم لاعبين فظروف مناخية استثنائية داكشي علاش المردود ديالهم كان استثنائي، وخدمنا بالتناوب بحيث ان لاعبين كيخدمو وآخرين كيرتاحو وامتلاك الكورة عن عندو دور كبير وحلاتنا مرتاحين خلال المباراة اللي  خلاتنا نشركو جميع اللاعبين وبالتالي كاع اللاعبين ديال ليكيب ناسيونال شاركو فالدور الاول”.

وكمل شيبا: “اليوم كان خاصنا نتحكمو فالماتش وما نخليوش إندونيسيا ياخدو الثقة خصوصا وآنهم مولفين على الجو وعندهم دعم الجمهور حيث لاعبين فبلادهم، داكشي علاش خدينا المبادرة ودرنا ضغط عالي وخلقنا فرص التسجيل وماركينا وكنا نماركيو كثر واخا تماركا علينا الهدف بقينا مركزين”.

وشكر الناخب الوطني اللاعبين وقال: “الفضل فتدبير الشوط الثاني كيرجع للاعبين اللي فهمو وعرفو كيفاش يكون امتلاك الكرة وان هذا الشي مهم، باش نقدرو نرتاحو وملي ماركينا تعمدنا نخليو مساحات للخصم حيث عرفانه غيمشي له التوازن وغيلغط  وفكل هجمة مرتدة كنا كنوصلو لمرمى الخصم بشكل واضح”.

وبخصوص تضييع اللاعبين لعدد كبير من الفرص قال شيبا: “الفينيسيون ديال الهجمات عندو بعد فني بالرجل او الرأس وفيها حتى العامل الذهني اللي كيخلي اللاعب يعرف يختار كيفاش وامتى وفين يضرب الكورة، وبالنسبة للاعبين الصغار كيكونو مازال ما اكتسبوش هذه القدرة”.

وبالنسبة للخصم ديال المنتخب المغربي فثمن نهائي المونديال، اللي غيكون احسن ثالثة، قال شيبا: “الهم ديالنا ملي بدينا البطولة هو استرجاع الحالة البدنية ديال اللاعبين بين المباريات، 4 ايام غتكون  مفيدة لنا، والمدربين ديال اللياقة البدنية كيديرو عمل كبير حتى لساعات متأخرة من الليل وكنشكروهم وهذا الشي اللي درنا كيتحسب لهم حتى هما”.