كود -وكالات//

شدّات الوكالة الوطنية النيجيرية لمحاربة المخدرات شيبانية عندها 101 عام، بعدما اتهماتها ببيع الحشيش فجنوب غرب نيجيريا.

المرأة، اللي سميتها إستر أوغونمابو، تشدّات نهار 15 غشت فمدينة إليسان بولاية أوغون، وكانت عندها  90 غرام من القنب من نوع “سكانك”، مقسّم فبواطات صغيرة، حسب ما قالت الوكالة.

وبحسب السلطات، الجدة كانت كتبيع هاد المخدر للجيران ولسكان الحي ديالها، وأوضحات للمحققين أنها دخلات لهاد التجارة بعدما تحرق محل البقالة اللي كان عندها، وهو الشي اللي خلاها  تبيع المخدرات باش تعيش.

وكشفت الوكالة أن وحدة من بناتها، اللي ساكنة فمدينة لاغوس القريبة من ولاية أوغون، كانت كتتكلف بتوفير المخدرات ليها كل أربعة أيام تقريباً، كيف كانت الأم كتعاود تبيعها بكميات صغيرة للناس فالحي.

وبسبب العمر ديالها ، أمر محمد بوبا ماروا، المدير العام والرئيس التنفيذي للوكالة الوطنية لمحاربة المخدرات، بإطلاق سراحها بكفالة، اما بنتها لي كانت كتفورني لها تشدات.