وكالات//

وقع واحد النقاش خايب بين النجم الميريكاني اللي ربح جائزة الأوسكار، دينزل واشنطن، وواحد من المصورين، فاش كان حاضر العرض الأول ديال الفيلم ديالو الجديد “Highest 2 Lowest” فمهرجان كان السينمائي، نهار الاثنين.

فواحد الفيديو اللي دار البوز فمواقع التواصل، بان دينزل واشنطن (70 عام) كيشير بصبعو فوجه واحد المصور، وبان عليه الغضب وسط لحظة توتر واضحة فوق السجادة الحمراء.

واحد الخبير ديال قراءة الشفايف، سميتو جيريمي فريمان، صرّح لموقع “ديلي ميل” أن دينزل بان معصب حيث داك المصور حط يدو على ذراعو.

وحسب فريمان، واشنطن صرخ وقال: “مرة وحدة، حبّس… خليني نوضح ليك، ما تبقاش تقيسني مرة أخرى نهائياً”.

وبالرغم من التحذيرات المتكررة ديال دينزل، الفيديو بيًن أن المصور ما بغاش يحبس وبقى فكل مرة كيلمسو، وزاد قال ليه: “واش نقدر ناخد صورة؟”، وهنا دينزل رد عليه بعصبية: “حبّس، باراكا، أنا كنهدّر بالصح، حبّس”.

وبان أن بعض المصورين اللي كانو حداهم ما فاقوش بلي دينزل معصّب، حيث بانو كيتبسمو وسط داك النقاش الحاد.