الوالي الزاز -كود- العيون////
فالعالم كاين مسؤولين ووزراء وحتى رؤساء وملوك كيحتارمو راسهم وكيكون عندهم نوع من التقدير للفرق اللي كتخدم معاهم خلف الكواليس ونهارا جهارا، ولكن حنا فالمغرب عندنا وزير ما باغي تاحد يبان معاه وباغي ياخد الصورة كاملة باش يبان للناس أنه هو مول الشي.
هاد الوزير گاع المغاربة ولاو عارفينو ويتعلق الأمر بوزير الشؤون الخارجية والتعاون الأفريقي والمغاربة المقيمين في الخارج، ناصر بوريطة، اللي مازال غادي فواحد الهيت ديال الاحتكار ومقاربة أنا اللي كاين بمباركة من الواد بتاع الوزير، وهي المقاربة اللي خرجات علينا فشحال من محطة وخلاتنا نخسرو معارك دباوماسية عدة، بسباب أنانية ناصر بوريطة.
آخر فصول هاد المقاربة ديال الاحتكار الزيارة ديالو لكرواتيا اليوم الاربعاء، بحيث صغّر بزاف بالوفد المغربي اللي كان معاه فلقائو مع نظيرو الكرواتي وقطع عليهم الما والضو باش ما يبانوش گاع من خلال عدم نشر صورة رسمية من صور اللقاء وهي الصورة اللي بانوا فيها مجموعين مع الوزيرين.
الوزير الكرواتي كبّر بيهم ورحب بيهم كيف كتبين الصورة، والأكثر من ذلك التاقطات وزارة الخارجية الكرواتية صورة ليهم ودارتها مع موضوع اللقاء بشكل عادي وفتصرف منطقي.
وهادشي طبعا فالوقت اللي وزارة خارجيتنا بقيادة ناصر بوريطة خدات جوج صور من أصل ثلاثة منشورين عند الخارجية الكرواتية ونشراتهم، نشرات جوج صور فقط ديال الوزيرين معا، فالوقت اللي ما بغاوش ينشرو صورة ليكيب كامل الشي اللي كيعكس الأنانية ديال هاد الوزير المسؤول على الصفحة الرسمية ديالنا.
هذا شوية من بزاف ديال الاحتكار ديال ناصر بوريطة وعدم احترامو للناس اللي معاه ولأطر وزارة الخارجية، اللي كبّر بيهم البراني فالوقت اللي ولد لبلاد حيدهم من الواجهة.
موضوعات أخرى
