كود اسماء غربي ////
العالم كيتقاتل يدير ابداع سينمائي يشارك فيه فكان ويفتاخر ببلادو وبثقافتو الا حنا لمغاربة. منذ مجيء الاخ صارم الفاسي الفهري الى المركز السينمائي المغربي وهاد الشي ضاربو لخلا. هاداك الرواق المغربي اللي كاين فالقرية الدولية قرب قصر المهرجان بكان عامر غير بشي منظمين مهرجانات فاشلة ضعيفة مقودة خايبة. شكون كيدي هادو وشكون سمح ليهم يمشيو من غير الفاسي الفهري
مع نور الدين الصايل باش كان مدير للمركز السينمائي كانت بداية التجربة والانفتاح على المهرجان وكرمو السينما المغربية كاع. واخا يالله باديين. كانوا كيمشيو نجوم سينمائيون كيتفرجو فالافلام كيتلاقاو مع صحاب السينما كيشمو ريحة الابداع وكيعيشوه خلال فترة المهرجان. هادي عامين تبدل كلشي. كتلقى عارضات ازياء اللي يستحيل كان يعرض عليهم كيمشيو وما عندهم علاقة بالتمثيل ولا حتى بعروض الازياء. كيمشيو شي وحدين ما عرفناش كيفاش ولاو ملكات جمال العرب. طبعا هادو ماشي لمشاهدة الافلام كيمشيو بل يدورو ويكذبو على عباد الله بصورة ولا جوج فطابي روج ولكن ماشي مع الطابي روج ديال النجوم اللي كتكون فالعشية وكتنقلها “كنال بلوس”. دابا حتى هاديك الحديوي مشات لكان وحشومة حتى للتعاويد
شي مدراء مهرجانات ما عمرني عرفت علاش كيديوهم. كاينين شي ناس فوزارة الاتصال او ملحقاتها كيمشيو يتجسسو على الافلام المغربية كيف دارو العام اللي فات مع فيلم نبيل عيوش الزين اللي فيك” واللي رسلو تقريرهم مع السي الفاسي الفهري للوزير الخلفي واللي دار سابقة فالمنع الغبي اذ منح فيلم مولاه ما طلبش رخصة كاع للاستغلال وبهاد الغباء نجح الفيلم نجاح كبير تجاريا فاوربا. دابا بحال هاداك الناجي ديال الهاكا اللي عارفين شكون جابو لهاداك المنصب واللي عندو الجنسية الكندية اش مشى يدير فكان غير يكولو لينا
ها العينة اللي كيديرها السيد الفاسي الفهري لكان