كود ـ سبور//

رجعات البعثة ديال المنتخب الوطني المغربي لأقل من 21 سنة لكرة اليد من بولندا، ولكن المفاجأة اللي صدمات الجميع هي غياب خمسة لاعبين اللي هربو ومابقاوش رجعو مع المنتخب!

القضية بدات من 21 يونيو، ملي اختفاو جوج لاعبين من نزل المنتخب، وتأكد من بعد أنهم هربو. وبعدها بأيام تزادو جوج لاعبين آخرين من وداد السمارة ورجاء أكادير حتى هما غابو، قبل ما ينضاف ليهم الحارس ديال فريق مجد سوق السبت، اللي كانت الإدارة ديال فريقو أصلا سبق ونبهات الجامعة أنه ناوي يهرب. حسب مصدر لـ”كود”.

الغريب فالأمر أن الجامعة ما خرجات حتى بلاغ رسمي، وبقات ساكتة، والناس بقات كتسول: كيفاش حتا هربو 5 لاعبين ومكاين لا مراقبة لا إجراءات؟

الناس اليوم كيطالبو بتحقيق رسمي وجدي، لمعرفة شكون كان وراء هاد الفرار، واش كانت شي تسهيلات من داخل أو خارج البعثة، وشنو مصير جوازات السفر ديال اللاعبين؟ واش تسلموها فعلا؟!

اللي أكيد، هو أن هاد القضية شوهات صورة الرياضة الوطنية، وخاص توضيحات ومحاسبة صارمة.