كود سبور//

مازال عدد من أندية البطولة ما بغاتش تدير قطيعة مع الهواية، وتواكب السرعة اللي غاديا بها الجامعة الملكية المغربية لكرة القدم والمنتخبات الوطنية، وهذه المرة فريق يوسفية برشيد كان غايدير شوهة بسبب رغبة اللاعبين ديالو فمقاطعة الماتش ضد اتحاد يعقوب المنصور ضمن الجولة 11 من بطولة القسم الثاني، كاحتجاج منهم على عدم توصلهم بالمستحقات المالية اللي كايتسالوها للنادي ديالهم.

وفي آخر اللحظات قبل الماتش ضد اتحاد يعقوب المنصور اليوم السبت فالرباط، وصل فريق يوسفية برشيد وبدقايق قليلة لدرجة ان اللاعبين ما داروش التسخينات قبل المباراة ودخلو لعبو نيشان، وهذا الشي بعدما كانوا مقررين يقاطعو المباراة لولا تدخل مسؤولين بالعصبة الوطني لكرة القدم الاحترافية، اللي قنعوهم يمشيو يلعبو الماتش، بعد تهديدهم بالاعتذار احتجاجا على المكتب المسير للنادي برئاسة البيضي ومطالبتهم له بصرف المستحقات ديالهم العالقة.