گود سبور//

مهدد فريق الجيش الملكي بشي عقوبة من الاتحاد الافريقي لكرة القدم بسبب شي افعال شغب داروها محسوبين على جمهور الفريق فـ الماتش ضد الاهلي المصري، البارح الجمعة فـ تيران مولاي الحسن بالرباط ضمن الجولة الثانية من دور مجموعات دوري ابطال أفريقيا.

وعرف الماتش بين الجيش الملكي والأهلي اداء تحكيمي مثير للجدل بقيادة الحكم الليبي أحمد الشلماني، اللي كانت القرارت ديالو مثير للاستغراب شحال من مرة، ولكن راه شي محسوبين على الفريق العسكري ممكن يتسببو فـ عقوبة من الاتحاد الافريقي على ليفار، بسبب القراعي ديال الما اللي گانو كايشيرو بهم كل مرة على لاعبين الاهلي، بالإضافة لواحد الالة حادة جابوها لاعبين الاهلي بالمضاربة مع لاعبين ليفار، وهزها واحد من طاقم الفريق المصري كايدعي أنها تلاحت من المدرجات ديال الجمهور العسكري.

هاد الأحداث ديال العنف الصادرة عن هرگاوا محسوبين على جمهور الجيش الملكي فايت وقعت فـ ماتشات ديال البطولة الاحترافية المواسم اللي فاتو، لدرجة انهم لاحو فـ شي ماتشات الحجر على لاعبين الخصم، وأشهرها الموسم الماضي ملي دخل الجنوب افريقي رولاني موكوينا للندوة الصحافية بعد الكلاسيكو فـ تيران القنيطرة بين ليفار والوداد وفـ وقتها كان مدرب د الفريق الأحمر، ودخل للندوة وجايب معه الحجر وحطو فوق الطبلة، وقال بلي جمهور ليفار شير بهم على لاعبين الوداد.

اليوم مظاهر شغب المحسوبين على جمهور ليفار فاتت ماتشات البطولة الاحترافية، ووصلت لدوري ابطال افريقيا المسابقة اللي متابعينها الملايين عبر العالم، والمصريين راه كايهضرو على هذا الشي ورجعوه بوليميك للتغطية على فشل الاهلي أمام الجيش الملكي خصوصا وان الفريق العسكري دار ماتش كبير وتعادلو معهم المصريين واحد لواحد، وبهدف بالشمة، وراه مجرد نقل صور القراعي ديال الما كايتلاحو للتيران وهاديك الالة الحادة اللي هز عضو الطاقم التقني للأهلي على قنواتهم شي حاجة اللي ممكن تمس الكورة المغربية وصورة المغرب، المقبل على احتضان كاس افريقيا واللي بقات له قل من شهر.

https://www.facebook.com/share/r/1KVWroArh8/?mibextid=wwXIfr