گود سبور//

شوهة عرفها تيران المسيرة الخضرا بآسفي بعدما سالا ماتش أولمبيك آسفي والوداد الرياضي يوم الأحد 9 نوفمبر 2025، برسم الدورة 8 من البطولة الاحترافية لكرة القدم، بطلها كار الوداد.

وتفجأت مكونات الوداد الرياضي ملي سالا الماتش مع أولمبيك آسفي، برغبة شي وحدين من أنصار الفريق المسفيوي في حجز الكار ديال الفريق الأحمر، وكايقولو إن فريقهم عندو حكم بالحجز على كار الوداد بسبب فلوس كايتسالوها للفريق الأحمر، وهي 150 مليون ديال صفقة انتقال بنيشو من أولمبيك اسفي للوداد وهذا الشي من أيام الرئيس الأسبق سعيد الناصيري ومازال لدابا هشام ايت منة الرئيس الحالي ما حل هذا المشكل.

مصادر أخرى كشفت أن الكار ديال الوداد الرياضي بقى واقف فـ الباركينگ ديال تيران المسيرة شي ساعة ونص بسبب تدابير أمنية بعد نهاية الماتش حتى يتفرق الجمهور وتخوا الطريق، وأن المسؤولين ديال أولمبيك آسفي ما جابوش مفوض قضائي لتيران المسيرة لتنفيذ الحجز على الكار د الوداد.