الرئيسية > ميديا وثقافة > شوهة تواصل لوزيرة هادي خدمتها. فالوقت اللي القطاع كيموت ولبلاد مسدودة ولخسارة وصلات لـ82 مليار درهم: لالة لوزيرة كتحوص فمراكش وكتضحك
15/01/2022 12:00 ميديا وثقافة

شوهة تواصل لوزيرة هادي خدمتها. فالوقت اللي القطاع كيموت ولبلاد مسدودة ولخسارة وصلات لـ82 مليار درهم: لالة لوزيرة كتحوص فمراكش وكتضحك

شوهة تواصل لوزيرة هادي خدمتها. فالوقت اللي القطاع كيموت ولبلاد مسدودة ولخسارة وصلات لـ82 مليار درهم: لالة لوزيرة كتحوص فمراكش وكتضحك

هند لكلاوي – كود مراكش ///

واحد المرشد سياحي فمراكش تصور مع وزيرة السياحة والصناعة التقليدية فاطمة الزهرا عمور وكتب “وقت زوين مع السيدة وزيرة السياحة. خلال جولة ثقافية لبعض المأثر التاريخية وزيارة صناع التقليديين فالسوق بمراكش” ونشر صورتو وصورتها كتضحك.

مشكلة كبيرة فهاد الصورة. فالهدرة اللي تكتبات. كيفاش قطاع طايح للرض. جوج قطاعات واكلين لعصا بسباب قرارات الحكومة تسد لبلاد: السياحة والصناعة التقليدية. واش وزيرة يمكن تحوص ودور كيف كتب هاد المرشد فعز الازمة؟ اش جابها لقطاع ما كتعرفوش. اما ايلى بغات تبين باللي مع هاد القطاع فهاد الازمة فراها عطات صورة معاكسة.

اما المشكلة لخرى فهي كيفاش بانت فالصورة. فازمة كبيرة كتهدد وجود قطاع كولو٬ بانت الوزيرة تقريبا فصورها كتضحك. فرحانة. ناشطة. واش هادي ما عندهاش اللي يوريها خدمة اصلا كانت كديرها وهي التواصل.

المجلس الجهوي للسياحة رد على زيارة لوزيرة عبر احد مسؤولي التواصل عندو. كتب باللي “الهدرة كتمشي والكتبة اللي تبقى”. قبل ما يزيد باللي فجهة مراكش الصويرة الحوز٬ بحال باقي جهات المغرب٬ الفاعلون فالقطاع بغاو حلول لمشكلة السياحة وللنقل الجوي قبل 27 يناير. واضاف ان عام 2022 غادية تكون عام اللي غادي  اما يحجزو فيه على اوطيلات ومؤسسات سياحية او هاد المؤسسات دير فاييت. الاغلاق كلف وفق نفس المسؤول خسارة وصلات ل82 مليار درهم فعامين.

موضوعات أخرى