كود الهرهورة//

من عجائب التسيير الجماعي، فالمغرب، كاين فمدينة الهرهورة، فينما درتي تلقا الفوضى والخروقات، من التعمير للنظافة إلى استغلال المرائب العمومية إلى الشواطئ الملوثة بالأزبال و”هركاوا”.

جولة صغيرة بهاد المدينة، غادي تكتشف مظاهر “التمدن المغشوش” وتاهركاويت ديال المسؤولين، وطبعا من السلطة المحلية إلى رئيس الجماعة الاستقلالي المحظوظ خليفة الرجل النافذ فوزي بنعلال.

جزء كبير من المظهر الخارجي لهاد المدينة “مشوه” غير بعيد عن فندق كونراد ديال الإماراتيين للي استقبل فريق ريال مدريد فكأس العالم للأندية سنة 2022، وهو الفندق المفضل لعدد من الوزراء بحال وزير الميزانية ووزير العدل.

هاد المدينة الساحلية الجميلة القريبة من الرباط، على وقع الفوضى وغياب المراقبة واستمرار مظاهر “عشوائية” ف جمالية المدينة، رغم مجهودات دارتها السلطات الولائية من خلال هدم عدد من البنايات غير القانونية بما فيها مقهى شيشا معروف وبيران كيتحداو القانون.

الغريب فهاد المدينة، هو فاش تزورها، كتلقا شواطئ عامرا أزبال وهادي مسؤولية الجماعة الترابية لمدينة الهرهورة لي كيسيرها حزب الاستقلال، فالمقابل كتلقا مالين الفيلات والمرفحين خصوصا بعض الشخصيات كولشي نقي ومهليا فيهم الجماعة.

فالمقابل الأماكن لي كيمشي ليها شعيبة، النظافة ناقصة بزاف، والدليل شوفو الطرقان والشواطئ كلها على الطريق الساحلي.

فهاد المنطقة كاينين بقايا الهدم فوق سطوح العمارات بلا إصلاح ولا ترياب، من نهار جات السلطة وهدمات البنايات لي تزادت فوق العمارات، كما توضح الصور لي كتوفر عند “كود”.

وللي زاد غضب المصطافين والمواطنين هاد العام هو الزيادة في تعريفة مواقف السيارات قرب الشواطئ وفي الشوارع، خصوصا فالصيف كتعرف المدينة إقبال كبير، وهادشي كيعني أن الجماعة بغات تدخل مداخيل كبيرة على ظهر المصطافين.

وسبق أن فرضت الجماعة تعريفة جديدة من السنة الماضية، بـ5 دراهم لأقل من ساعة إلى 23 درهما لليوم، مع الرفع من مبلغ الانخراط إلى 400 درهما نهارا و500 درهم ليلا، ولكن يلا عرفتو كيفاش كيتجمعو فلوس ديال الباركينغ، غادي تصدمو، بحيث الجماعة استعانت بصحاب الجيليات وعطات الإذن باسم الجماعة لشي شركة باش يجمعو فلوس عند المواطنين بطريقة عشوائية. وللي كيجمعو فلوس مبلين وعليهم علامات الادمان ف أجسادهم.