كود سبور//

تسبب خوض منافسات دوري أبطال إفريقيا للسيدات بملعب العربي الزاولي بالدار البيضاء، فمشكل للوداد والرجا اللي خاصهم يلقاو فين يلعبو ماتشات البطولة الاحترافية.

وأول المشاكل المطروحة دابا، هو أزمة برمجة ماتش الوداد واتحاد طنجة، اللي مبرمجة يوم الاحد الجاي، والوداد باغيين يلعبو الجمعة باش يستافدو من تيران العربي الزاولي وما باغينش يلعبو فتيران البشير فالمحمدية، وباغيين يستفادو من تيران العربي الزاولي، قبل ما يبداو يتلعبو فيه ماتشات الفرق المشاركة فدوري ابطال إفريقيا للسيدات، وهي المسابقة اللي غايكون الافتتاح ديالها السبت الجاي فالجديدة، وبالمقابل اتحاد طنجة رافضين ومتمسكين بأنهم يلعبو يوم الاحد الجاي، وما عندهمش مشكل انهم يلعبو فتيران البشير فالمحمدية.

مصادر مطلعة، كشفت أنه دابا كاين مقترح لبرمجة الماتش بين الوداد واتحاد طنجة السبت الجاي مع 8 الليل فتيران العربي الزاولي، اي قبل من يوم واحد على احتضان التيران لماتشات دوري أبطال افريقيا للسيدات، حيث العربي زاولي غايلعبو فيه الگروب الثاني من شومبيونزليگ العيالات ابتداء من الاحد الجاي، وافتتاح المسابقة غايكون السبت الجاي فتيران العبدي بالجديدة اللي غايلعب فيه الگروب الاول، وهذا المقترح اللي كاين دابا لبرمجة الماتش بين الوداد واتحاد طنجة يوم السبت الجاي فتيران العربي الزاولي، خاص يوافقو عليه الوداديين وطنجاوا بجوج، باش توافق العصبة الوطنية لكرة القدم الاحترافية على تعديل برمجة المباراة، مع العلم أن طنجاوا ما بغاوش مقترح الوداد بتقديم الماتش من الاحد فتيران البشير بالمحمدية إلى الجمعة بالعربي الزاولي.