كود – أزيلال//

دافع محمد شوكي، رئيس حزب التجمع الوطني للأحرار، بجهد على رئيس الحكومة عزيز أخنوش، وقال باللي هاد الخمس سنين تعرض لهجمات وانتقادات كثيرة استهدفات شخصو والعمل ديال الحكومة، ولكن هادشي ما قدرش يوقفو على مواصلة الخدمة.

شوكي، اللي كان كيهضر البارح الاثنين فلقاء تواصلي بمنطقة بني عياض بإقليم أزيلال، قال باللي أخنوش “ما تنصفش طيلة هاد الخمس سنوات”، وضاف أنه تعرض لـ”هجمات كثيرة”، وتبخيس للعمل ديالو، وحتى التشهير بشخصو.

وزاد شوكي: “أخنوش ماقدوش عليه.. بقى واقف، ما قدوش عليه، بقى واقف”.

رئيس الأحرار ما وقفش غير عند الدفاع على أخنوش، ولكن ربط بين الهجمات اللي تعرض ليها رئيس الحكومة والاستهداف اللي قال بلي قاسو  شخصيا هو كذلك فالفترة الأخيرة.

وقال: “اليوم جاو استهدفوني حتى أنا شخصيا بنفس الأساليب اللي بعيدة على السياسة”، واعتبر أن هاد المحاولات ما غاديش تبدل اختيارات الحزب ولا توقفو على مواصلة المسار ديالو.

وبخصوص حصيلة الحكومة، اعتبر شوكي أن التجمع الوطني للأحرار كيراهن على تجديد هاد الثقة من خلال “المعقول والعمل والجدية”، مشيرا إلى أن الحكومة تحملات مسؤوليتها فواحد الظرف الاستثنائي، اللي عرف أزمات وصعوبات كثيرة.

وقال بلي الحكومة ما “هرباتش من المسؤولية”، قبل ما يستحضر الجولات اللي داروها مسؤولو الحزب فمختلف مناطق المغرب، خصوصا من بعد منتصف الولاية الحكومية، واللي قال بلي كانت مناسبة للاستماع للمواطنين والوقوف على الإكراهات والمشاكل ديالهم.

وفنفس السياق، بين شوكي على بعض الخطوط العريضة للبرنامج الانتخابي ديال الحزب، وقال باللي غادي يركز على الدفاع على القدرة الشرائية، والأجور، ومعاشات المتقاعدين.

وأكد أن الحزب ملتزم باتخاذ إجراءات لتحسين معاشات المتقاعدين، بما يضمن ليهم، حسب تعبيرو، مستوى لائق من العيش الكريم.

شوكي وجه حتى رسالة لمغاربة العالم، واستحضر الظروف الصعبة اللي دازت منها الأسر الفلاحية بسبب سنوات الجفاف، وشار للدور اللي لعباتو تحويلات أفراد الجالية فمساعدة عدد من الأسر على تجاوز تداعيات الأزمة.

وفي تقييمو للحصيلة الحكومية، وصف شوكي حصيلة حكومة أخنوش بأنها “حصيلة جد مشرفة”، واعتبرها حصيلة ديال “المعقول والجدية والوضوح”.

وفالأخير، طلب رئيس حزب التجمع الوطني للأحرار من الناخبين يعطيو للحزب ولاية انتدابية ثانية، باش يكمل الإصلاحات الاجتماعية اللي بداها.