كود الرباط//

قال محمد شوكي، رئيس حزب التجمع الوطني للأحرار، خلال لقاء تواصلي بإيمي نتليت بإقليم الصويرة، إن الرفع من الأجور وتحسين دخل المغاربة ما كيتحققش بقرار فردي ولا بـ”كاشي” ديال وزير نهار الخميس، وإنما هو نتيجة مناخ ديال الثقة وحوار مسؤول مع النقابات والمشغلين، واحترام للمؤسسات والمساطر اللي كتأطر القرارات الاجتماعية الكبرى.

وشدد شوكي على أن التجمع الوطني للأحرار حزب مسؤول، كيتحمل المسؤولية ديالو كيفما كان الموقع ديالو، سواء فالحكومة أو المعارضة أو فتدبير القطاعات والمؤسسات، وأن الهدف بالنسبة ليه ماشي غير تدبير مرحلة سياسية، ولكن المساهمة فبناء دولة قوية كتواكب المواطن وكتحميه فمختلف المراحل ديال حياتو.

وفي موضوع الأجور، أكد شوكي أن الحكومة قدرت تحقق زيادات مهمة وتحسن الوضعية الاجتماعية ديال مجموعة من الفئات والقطاعات، وأن مجموع الالتزامات الاجتماعية تجاوز 45 مليار درهم، وكل هادشي جا فإطار الحوار مع النقابات وأرباب العمل وبناء مناخ ديال الثقة بين مختلف الفرقاء.

وشدد على أن هاد النتائج ما جاتش لأن شي وزير كان عندو “الكاشي” وقرر يوقع، وإنما لأن الدولة فيها مؤسسات، والحوار الاجتماعي فيه نقابات ومشغلين وحكومة، والقرارات اللي كتمس الأجور وحقوق الشغيلة خاصها تتبنى بالتوافق والمسؤولية.

وفي هاد الإطار، أكد شوكي أن التجمع الوطني للأحرار كيتطلع خلال المرحلة المقبلة إلى رفع الحد الأدنى للأجور لـ5000 درهم، باعتباره التزاما كيدخل ضمن رؤية متكاملة لتحسين دخل الأسر وحماية القدرة الشرائية، وليس مجرد رقم كيتقال فالحملة الانتخابية.