كود سبور//

أكد الناخب الوطني المغربي سعيد شيبا مدرب المنتخب الوطني المغربي للفتيان أن التأهل إلى نهائي كاس إفريقيا لكرة القدم كان صعيب، وأن الماتش ضد منتخب مالي فدومي فينال البطولة مكانش ساهل وبلي المنتخب غيبدا يوجد للنهائي ضد السنغال، وشكر شيبا سكان مدينة قسنطينة على حسن الضيافة.

وقال سعيد شيبا فتصريح له بعد ماتش المغرب ومالي: “الماتش كان صعيب بزاف وكان علينا نلقاو الطريقة المناسبة لمجاراة المنتخب المالي اللي عندو إمكانيات كبيرة في فئة أقل من 17 عام، واللاعبين ديال المنتخب المغربي بالرغم من صغر عمرهم بينو على نضج كبير وهذا مكسب كبير على المستوى التكتيكي غيفيدهم فالكاريير ديالهم”.

وزاد شيبا وقال: “البيلانتيات جزء من السيناريوهات المتاحة فماتش دومي فينال كاس إفريقيا واخاصنا حنا كطاقم تقني نكونو موجدين لها بحال سيناريوهات 90 دقيقة، وهي مهمة عندنا قبل ماتش الربع وبعد منو، وركزنا عليها خلال الحصص التدريبية وملي كان التحضير مزيان راه اللاعبين مشاو بالماتش لداكشي اللي كيناسبنا”.

وأوضح الناخب الوطني: “بعد الوصول لضربات الترجيح كان علينا نحيدو الضغط على اللاعبين، وهنا خاصنا نختارو الكلمات المناسبة باش نتكلمو مع هذه الفئة السنية باش يمشيو للبيلانتيات متحررين من الضغوطات ويديرو لوجيست تيكنيك المناسب فالتوقيت المناسب، وعاونا لكول ديالنا وهذا رباح د كروب من المقاتلتين الصغار وتجازاو فالبيلانتيات، دابا غنبداو نوجدو للفينال ضد السنغال وعندنا الوقت من هنا ليوم الجمعة المقبل”.

وختم شيبا بميساج لجمهور مدينة قسنطينة الجزائرية فين لعب المنتخب المغربي جميع ليماتش ديالو في بطولة كأس إفريقيا لأقل من 17 عام وقال: “كنشكر ناس قسنطينية على حسن المعاملة ونتمناو نكونو ضياف خفاف عليكم وإلى اللقاء”.