وكالات//

عرفات واحد المنطقة فروسيا، حالة غريبة من نوعها، حيث مسؤول فخدمة التنفيذ اللي مكلفة بتحصيل النفقة ديال الأطفال كشف على محاولة “ماشي عادية” باش واحد الراجل يهرب من أداء النفقة.

وبحسب موقع “أوديتي سنترال”، المسؤول قال للصحافة المحلية بلي واحد الراجل كان كيبدّل الاسم ديالو كامل ـ الاسم الشخصي، واسم الأب، واسم العائلة ـ كل عام، باش يهرب من الالتزامات المالية تجاه ولدو.

ومن بعد عام، كيعاود يرجّع الاسم الأصلي ديالو وكيعاود نفس العملية من جديد، على أمل يتفادى رجال التنفيذ وتلغى ليه الديون. ولكن هاد الحيلة ما خدمتش، حيث مكاتب التسجيل كيعلمو خدمة التنفيذ بأي تغيير فالأسماء، وهاد الشي كيمنع الناس يستعملو هاد الطرق باش يهربو من النفقة.

المسؤول قال حتى بلي هاد الحالة ماشي هي الوحيدة، كاين بزاف ديال المحاولات الغريبة للهروب من دفع النفقة. كاين اللي ادّعى الوفاة باش ما يخلصش، وكاين اللي حاول يزوّر نتائج ديال اختبار الحمض النووي باش يتهرّب من المسؤولية.

ومسؤولو التنفيذ قالو بلي بعض الناس المحليين كيلجؤو باستمرار لحيل غريبة باش ما يخلصوش ديونهم. ومن الأمثلة اللي تضحك: واحد السيد ادّعى عندو رهاب من الأماكن المفتوحة باش يمنع رجال التنفيذ يدخلو لدارو، مع أنه عندو أكثر من عقار، وواحد منهم مهدد بالحجز.