احمد الطيب – كود الرباط//

روينة والفوضى بمجلس المستشارين سواء على المستوى الإداري وحتى على مستوى الحكامة فتدبير الموارد البشرية، فحسب مصدر “كود” هاد المؤسسة ما يقارب 400 موظف خدام فيها، ومصدر رسمي كيقول 380 موظف وموظفة منقسمين على ثلاثة أقسام.

القسم الأولى، فيهم موظفين المجلس فالإدراة، والقسم الثاني هوما موظفي المجلس فالفرق البرلمانية، والقسم الثالث هوما الموظفين فالديوان ديال رئيس الغرفة الثانية.

معدل الموظفين لكل برلماني، هو المقياس ديال النجاعة والتطور والفعالية، فهاد المؤسسة كيعطينا تقريبا 3 موظفين لكل برلماني. كاينين 190 برلماني.

كاينا اسباب كثيرة كتفسر هاد الضعف فالتدبير الاداري للمجلس، منها غياب مقرات للعمل، كاينا اطر معندهاش مكاتب، مجلية وصافي داخل اروقة المجلس، منهم لي كيشتغل عن بعد. وكاين لي كيستغل هادشي ويدير ما بغا. بلا رقيب ولا حسيب.

ضعف الموظف كيعني ضعف البرلماني، وهادشي باين دبا فمجلس المستشارين، تراجع خطير للمستوى والنقاش السياسي، وغياب المعارضة وضعف التواصل.

الموظف هو لي كيوجد الأسئلة والتعقيب والأجوبة، يلا كانو هاد الموظفين مكيديروش خدمتهم راه البرلمان كولو غايكون ضعيف، حسب مصدر “كود”.
الوضعية فهاد المجلس مكفسة بزاف، واخا جا رئيس جديد، جا من تجربة فالتسيير ناجحة فالاقاليم الجنوبية، لكن راه قدامو ادارة عيانة وموظفين فوق القانون، والغريب معدل يقدر يوصل 3.3 موظف لكل برلماني.

اجيو نديرو مقارنة مع مجلس النواب لي فيه الدمير وتمارة، كنلقاو 460 موظف تقريبا لـ395 نائب، قليلة بزاف، ورغم ذلك الموظفين كيخدمو كثر من جهدهم.

وحسب معلومات “كود” فإن رئيس مجلس النواب، من نهار الاول فاش جا، هاد الموضوع عطاه اهمية وقال فاجتماع بلجنة المالية أثناء مناقشة مشروع ميزانية البرلمان لسنة 2022، بانه خص تحسين وضعية وظروف الموظفين بما له من تأثير على جودة العمل البرلماني والتشريع والرقابة.

مصدر مسؤول بمجلس المسشتارين تحدث مع “كود” قال بلي عدد الموظفين بالمجلس قليل مقارنة مع التجارب الدولية، ففي فرنسا مثلا كتلقا برلماني كيخدم معه 9 أطر. من غير هاد المقارنة لي ماشي سليمة وماشي منطقية، فراه كاين مشكل كبير فتدبير الموارد البشرية، هادشي لي كيتسبب طبيعيا استمرار ظاهرة الموظفين الاشباح، او الغياب ديالهم عن العمل.

كاينا مسألة أخرى كتأثر على تدبير المجلس، هي كراء المقرات، غانرجعو ليها فمقالات مقبلة.

الخلاصة هي : اش خاصك العريان الريع امولاي.