مصطفى المزابي – كود سطات //

مدينة سطات كتعاني هاد الأيام من وضع كارثي فالبنية التحتية، وهادشي مخلي الساكنة وسائقي الطاكسيات الصغار يعانيو يومياً. الحفر والأودية منتشرات فمعظم الشوارع والأزقة، والسبب هو الأشغال العشوائية ديال بعض المقاولات اللي ما كتحترمش المعايير. هاد الوضع ولى كيهدد سلامة الناس وكيرفع من تكاليف الصيانة والإصلاح، بلا ما نهضرو على الأضرار اللي كتسببها للسيارات وكترة الحوادث.

التنسيقية المحلية لمهنيي الطاكسيات الصغيرة فسطات عبرات على استنكارها الكبير لهادشي، وكتطالب بتدخل عاجل من المجلس الجماعي والجهات الوصية باش يصلحو هاد الشوارع اللي ولات بحال الفخاخ. السائقين كيعانيو يومياً من هاد المشاكل، وكيشوفو أن الحلول الترقيعية ما كتنفعش، حيث بعد أيام قليلة كتعاود ترجع الحالة كيف كانت، ولا أسوأ.

المهنيين كيطالبو بتحسين جودة الأشغال الطرقية باش تكون حلول دائمة ماشي غير ترقيعات مؤقتة، وكيدعو المسؤولين يتحملو مسؤوليتهم الكاملة فالأضرار اللي كتعاني منها سياراتهم بسبب إهمال صيانة الطرق. كاع الناس اللي خدامين فهاد القطاع مستعدين يديرو جميع الأشكال النضالية المشروعة باش يدافعو على حقوقهم ويحسنو ظروف العمل ديالهم.

التنسيقية كتنادي كاع المهنيين، والجمعيات، والحقوقيين، وحتى الصحافيين باش يساندو هاد المطالب ويمارسو الضغط على المسؤولين باش يكون حل فوري وفعلي، حيت الوضع ما بقاش قابل للسكوت. وكما كيقول المثل، ما ضاع حق وراءه مطالب.