كود الرباط//

قالو شهود لـ”كود” بلي كانو شافو ولد العامل ديال ورزازات قبل الكسيدة، مقصر عادي وناشط، ف “سكاي بار” بدوليز فسلا، والأمور كانت عادية قبل ما يخرجو يشدو الطريق ويتسابقو ويديرو كسيدة خايبة حدا وزارة الخارجية صباح السبت 8 يونيو 2024، مع ديك 5 صباح تقريبا أول اقل.

هاد الشهود كانو شافو كذلك الكسيدة الأليمة واللي مات فيها ولد عامل ورزازات، وإصابة فتاة للي دابا فالإنعاش وخوه بجروح خطيرة.

نفس الشهود أكدو لـ”كود” بلي الضحية مع صحابو كانو ناشطين وضربو القاسح يعني مفوتين. وبلي فاش وصلات الثالثة صباحا جاو المستخدمين كيطلبو من كولشي يخرج باش يسدو. ديك اللحظة بقاو تقريبا شي نص ساعة يضيف “شاهد” لـ”كود”. علاش بقاو نص ساعة تقريبا؟ حيث كتكون المنافسة بيناتهم شكون غيخلص على لاخر.

المعاندة بين صحاب الفلوس على شكون يخلص زادت تقريبا نص ساعة على التوقيت القانوني للإغلاق. هنا الأمور عادية.

مورا هادشي، اللي مقصرين خرجو بحالهم، منهم ولد العامل وخوه، السرعة والتسابق خلاهم يديرو كسيدة خايبة بزاف لدرجة أن موطور طوموبيلة يطير من بلاصتو لمسافة بعيدة وكذلك بوطو ديال الضو يطير.

ولد العامل كان راكب بنتلي دار كسيدة مع زماكري عايش فالطاليان أصلو من الفقيه بنصالح. كسيدة خايبة تصاورها وفيديوهاتها تنتشرو بزاف على مواقع التواصل الاجتماعي.