هناء ابو علي – كود

—

وزارة الخارجية المغربية كانت اول وزارة تهتم بالانترنيت و العالم الرقمي و كانت اول وزارة مغربية و هادشي مزيان دارت تويتر و  صفحة فايسبوك حاصلة على علامة زرقاء ومقادة تبارك الله وكتدير الهاشتكات وكلشي بخير بل ان حتى شي سفارات و قنصليات تاهما دارو صفحات الفايسبوك , هادشي وخا معطل ولكن كايبين بلي الادارة المغربية مابقاوش فيها غير الديناصورات بل كاينين شباب عارفين اهمية التواصل الرقمي.. هادشي كلشي مزيان

ولكن اشنو هي الرسالة اللي بغات صفحة وزارة الخارجية اللي هي صفحة رسمية بشهادة الفايسبوك توصل ملي دايرة جيم او لايك لشي صفحات بحال صفحة سفيان البحري الشخصية و صفحات تنقل صور الملك محمد السادس  في الخارج و الداخل؟  راه بحال الا جهة حكومية معترفة رسميا بان  تلك الصفحات تاهي رسمية تمثل القصر الملكي اللي كاينفي شحال من مرة انه ماعندو تا قناة تواصل رسمية من غير ناطق رسمي ووزارة القصور و الاوسمة ؟

هادشي اللي يقدر يفهم الواحد ولاشيء غيره ان الصفحات التي يسيرها البحري و المهدي بنكيران و غيرهما هي صفحات رسمية والا شنو معنى هاد جيم كما تبنين الصورة؟

حنا ف” كود “نقول ان كل واحد يدير اللي عجبو٬ ولكن قلناها شحال من مرة هاد الشي اللي كيديرو البحري ودابا زاد معاه بنكيران خطير. كيهدرو باسم اهم مؤسسة فالمغرب. حنا نؤمن ان الجهات العمومية الرسمية خصها تعامل الجميع على قدم المساواة، وخص القصر الملكي يدير كما جميع الملكيات ف العالم صفحات رسمية موثقة ف وسائل التواصل الاجتماعي و كلشي وسائل الاعلام  ياخذو منها الاخبار بلا تمييز .. و فانتظار هادشي.. نتسناو الخارجية توضح  هاد اللايكات التي يوزع مسؤول الصفحة ديال وزارته يمينا  و يسارا فالفايس  حتى حنا راه ماكرهناش يدير لينا واحد جيم لصفحتنا ف الفايس.