فاطنة لويزا كود//
بعد انتهاء الخطاب الملكي بمناسبة عيد العرش، كان واحد التفاعل في مواقع التواصل الاجتماعي، كيركز على قول الملك في الخطاب أن المغرب كيمشي بزوج ديال السرعات مختلفة، كيما كان التركيز وإن بشكل أقل بتكرار الملك لمقولة: حل لا غالب فيه ولا مغلوب، فيما يخص النزاع المفتعل حول الصحراء.
ولذلك غنحاول فالكرونيك ديال اليوم، أني نقدم شنو فهمت من هاد العبارتين، ولي هوما بالفعل سوارت ديال فهم خطاب العرش ديال هاد السنة.
غير هو قبل هادشي، لا بد مندير واحد الإشارة.
وهي أن الملك عطا توجيه لوزير الداخلية باش تبدا الاستعدادات للانتخابات الجاية، ولي أكد الملك على الحرص ديالو الشخصي أنها تكون في الوقت ديالها دون تقديم أو تأخير.
وهاد التوجيه مهم، حيت انتظام الانتخابات في وقتها، هو علامة من علامات قوة أي دولة واستقرارها.
الدول لي مازال فيها تنظيم الانتخابات مشكلة، ولي كتخاف من أن نتائج التصويت ديال المواطنين تقد تجي بمفجآت لي تقدر تهدد التوازنات القديمة، هي ببساطة دول غير مستقرة سياسيا.
في عهد حكم محمد السادس، كان موعد تنظيم الانتخابات معروف، والحالة الوحيدة لي متجراتش الانتخابات في وقتها، ما كانش السبب مرتبط بشي توتر سياسي، بل كان مرتبط بتقوية المسار الديمقراطي، حيت كان دستور جديد، ولي الحكومة ديال عباس الفاسي آنذاك ما بقاتش متوائمة من الناحية التنظيمية مع داك الدستور، فمثلا الدستور يتحدث عن رئيس الحكومة، فيما عباس الفاسي كان وزير أول فقط، ثم اختصاصات الحكومة في دستور 2011، ماشي هي اختصاصات الحكومة في دستور 1996 لي تنصب بموجبه عباس الفاسي وزيرا أولا، لذلك كان ضروري أن الانتخابات يتم تقديمها.
إذن، التوجيه الملكي لوزير الداخلية هو إشارة إلى أن المغرب مازال بلد مستقر سياسيا، وأن البلد لي نظم الانتخابات البرلمانية والجماعية في يوم واحد، وأثناء كورونا، مع اتخاذ جميع الاحتياطات الاحترازية المرتبطة بالوباء، هو بلد مكتخلعوش الانتخابات، بغض النظر شكون غيطلع وشكون غيمشي للمعارضة.
وهاد الإشارة، ماشي موجهة غير للخارج للدلالة على استقرار البلاد وقوتها، سواء للناس الراغبين في الاستثمار في بلادنا، او للناس المنخرطين في الهجمات المخدومة ضد المغرب، والممولة من دول معروفة، ولي كيروجو لشي أزمات في مربع الحكم، كاينة غير في أحلامهم المريضة بالمغرب.
بل موجهة كذلك لشي أحزاب وشي سياسيين، لي غير كتقرب الانتخابات كيبداو يديرو الابتزاز، او يهيئو القواعد الانتخابية ديالهوم لشي هزيمة متوقعة، أو ينتقمو من الدولة حيت دارت خدمتها، ودارت متابعات ليهوم بعد ما ثبت تورطهم في جرائم مالية عندها علاقات بتسييرهم للشأن العام.
وهادشي شوفناه مؤخرا.
بنكيران رجع لأسطوانة أن انتخابات 2021 كان فيها تدخل الإدارة الترابية، وهو لي كيفسر ديك الهزيمة الانتخابية غير المسبوقة في تاريخ الانتخابات في المغرب. في حين أن الحزب كانو عندو مراقبين، والحزب ما طعانش في النتائج الإجمالية، فيما على مستوى الدوائر، كل الطعونات تم فيها البث قضائيا، سواء برفضها أو قبولها، وكاين انتخابات لي تعاودت فبعض الأماكن، ولكنها مغيراتش من الخريطة الانتخابية، بل أحيانا رجعت المقاعد للأغلبية.
لشكر، لي رجع غير كيضرب ويزكل، قاليك خاص الرجوع لنمط الاقتراع الإسمي، ودعا لتشكيل جبهة وطنية لحماية نزاهة الانتخابات.
دابا كيفاش واحد تقدمي كان ضد نمط الاقتراع الإسمي فاش كانت الأمية منتشرة، ودابا كيدعي ليه فاش تطورنا، وباغي يرجعنا لعهد اللون الحمامي واللون الكاكي واللون البيستاجي واللون الليموني.
أما حكاية الجبهة الوطنية لحماية الانتخابات، فخاص لشكر يكون هاني، حتى حد ما غياخود الدعوة ديالو بجدية، وحتى النهج الديمقراطي لي كيبان ليه كلشي مزور مكايشاركش أصلا في الانتخابات.
واحد البرلماني ورئيس جماعة سابق في فاس، حتى تشد، عاد قاليك أنه عطى لشي مسؤول محلي في الداخلية 800 مليون باش يربح، بحالا الأحزاب لوخرا مكانش عندها مراقبين، وبحالا مسؤول واحد يمكن يقاد هادشي كلو بوحدو، في حين أن العملية فيها شلا متدخلين.
غير هو وزير الداخلية في البرلمان مكانش واضح وصارم في الجواب ديالو على هادشي، حيت ببساطة هادشي ما فيهش اللعب، وكان على الداخلية أنها تقدم شكاية في حق هاد البرلماني السابق، أو أنها تطالب النيابة العامة بفتح تحقيق.
دابا نرجعو لمقولة: المغرب يمشي بسرعتين.
في اعتقادي أن هاد الشي ماشي جديد، وأن الملك سبق له أكثر من مرة أن قال هادشي بصيغ مختلفة، ولكنها واضحة.
وهادشي حتى المواطنين كيقولوه، والملك تجاوب مع نبض المواطنين.
وباعتباره رئيس دولة مسؤول، ما نكرش هاد الحقيقة، بحالا ما كيديرو رؤساء في دول مجاورة.
كاين لي فمواقع التواصل الاجتماعي ربطو هاد القولة من طرف الملك، بمسيرة أيت بوكماز الأخيرة، خصوصا أن الملك عطا تفسير بالوضع الصعب لي كتعيشو ساكنة العالم القروي.
وكاين لي مشا إلى حدود اعتباره ردا غير مباشر على رئيس الحكومة بخصوص تصريحه المرتبط بتداعيات تلك المسيرة.
وطبعا خاص نكونو هبال، باش نعتبرو الملك كيمعني على أخنوش، بحالا حنا في إنجلترا وكاين توتر بين القصر ورئاسة الحكومة.
الملك عندنا كيحترم المؤسسات، وإذا بانتليه شي حاجة ماشي هي هاديك، أو شي تصريح ملاوط، من طرف الحكومة، فإما يستدعي رئيس الحكومة أو الوزير المعني، ويتحدث معه، أو الديوان الملكي كيخرج بيان واضح.
ماكاينش ديك الشي ديال ضريب المعاني بين الملك ورئيس الحكومة، وما يمكنش.
في رأيي أن إعادة الحديث عن المغرب الذي يسير بسرعتين، هو تذكير بهاجس ملكي متعلق بأمرين: الأول هو الفروقات المجالية، حيت كاين مناطق كتعرف تنمية قوية وكاين مناطق حابسة في لحظة ما قدراتش تحرك منها. فجهة طنجة تطوان الحسيمة مثلا عرفت تطور سريع، في حين مثلا ان جهة الراشيدية درعة بقات فبلاصتها.
والثاني مرتبط بالتوزيع العادل للثروة، بحيت أن المشاريع الكبرى والاستثمارات الكبيرة كان عندها دور إيجابي في تنمية ثروات البعض وفي تحسين دخل فئات اجتماعية كثيرة، ولكن كاين فئات لي ما استفداتش من هاد الوضع.
وهادا هو جوهر النموذج التنموي الجديد، كيفاش نقلصو التفاوتات الطبقية والمجلية.
الملك اعتبر أنه ما زال كاين مشكل على هاد الجبهة.
وكذلك مخاصناش ننساو ان المغرب مقبل على أوراش كبيرة متعلقة بكأس العالم، ولي غتنظم فمدن طنجة وفاس والرباط، والدار البيضاء، ومراكش، وأكادير، ولي هوما مدن نسبيا فيهوم بنيات تحتية مزيانة مقارنة مع باقي المناطق، وكاين خوف أن المشاريع الكبرى لي غتزاد تدار فيها، تزيد تعمق هاد التفاوتات المجالية.
ولذلك كان التدكير الملكي مهم بالنظر لهاد السياق، وحتى فوزي لقجع في البرلمان أثناء نقاش القانون المحدث لمؤسسة المغرب 2030، كان شار ان مشاريع البنيات التحتية لي غتقاد بمناسبة المونديال غتاخود في عين الاعتبار احتياجات المناطق المحتاجةـ ماشي فقط مدن المونديال.
أما بخصوص: لا غالب ولا مغلوب.
فوالله أنا ما فاهمة هاد الزوبعة علاش؟
وكيفاش شي عولاما مشاو بعيد، وقاليك واش الملك كيهيأنا لتقسيم الصحراء مع البوليزاريو.
الرجوع لله.
راه أصلا ديك المقولة كان قالها الحسن الثاني قبل، فاش قال انه ممكن يتنازل على كلشي باستثناء العلم وطابع البريد، أي السيادة باختصار، ولي كانت فيها تلميحات للحكم الذاتي تحت السيادة المغربية، واستخدمها الملك الحالي كذلك في 2007 فاش تم طرح المبادرة المغربية للحكم الذاتي.
يعني عندها علاقة أساسا بالحكم الذاتي تحت السيادة المغربية، ولي هو أقصى ما يمكن ان يقدمه المغرب من تنازل لطي صفحة هاد الصراع لي ماشي في مصلحة أي أحد.
وفاش كيعاود الملك اليوم التذكير بهاد القول، فما قال لا بوليزاريو لا والو، قالو في سياق الحديث عن الجزائر والاتحاد المغاربي، بمعنى ان المغرب واخا يربح ملف الصحراء وهو رابحو أصلا، فإنه لا يسعى إلى أن تخرج الجزائر منهزمة، بل ممكن أنها تكون شريكة في ثمار طي هاد الملف، بطريقة ممكن حتى هي تربح شي حاجة، مثلا ما يتعلق بمشروع الميناء الأطلسي في الداخلة، ومشاريع تنمية الواجهة الغرب/أطلسية لإفريقيا.