الرئيسية > آراء > شنو علاقة الراضي الليلي برأفت الهجان؟
05/12/2018 18:00 آراء

شنو علاقة الراضي الليلي برأفت الهجان؟

شنو علاقة الراضي الليلي برأفت الهجان؟

هناء ابو علي-كود//

كاين مشهد ف مسلسل رأفت الهجان  وهاد الايامات راه كايبارطاجيوه ف الفايسبوك بزاف، وخلاصته ان رأفت الهجان كان كايقلب على شي اسرائيلي يجندو لصالح المخابرات المصرية و اقترح على الشاف ديالو يجند واحد السيدة كانت كتنتقد بزاف السياسيات الاسرائيلية و بانت ليه  مؤهلة يجندها تجسس ليهم ..وملي عرض هاد الاقتراح الشاف ديالو قال ليه : ابدا و عندك من هاد الفكرة ماغاديش توصلك لاي هدف..علاش حيث الناس اللي كاينتقادو و كايبينو رفضهم  كايكونو هما اللي كايبغيو البلاد بصح و قلبهم عليها .. هادوك هما الوطنيين ديال بصح ..وقال ليه خصك تقلب تجند اللي  كايظلو  يطبلو  لاي قرار رسمي حيث  انتهازيين و ماعندهم مبدأ و مستعدين يبيعيو لاي واحد يدفع الثمن …و بالفعل ف ف المسلسل الهجان اللي كان كايوصل الاخبار هما مسؤولين و عسكريين مطبلين و صحفيين متعصبين  للزعماء د اسرائيل ..

مناسبة هاد  الكلام كما سيتضح هي المدعو الراضي الليلي  اللي دار حوار مع صحيفة الشروق الجزايرية كايعلق على المفاوضات اللي غاتدي تكون  على قضية الصحراء ف جنيف بحضور اطرف النزاع ومن بنيهم الجزاير و موريتانيا .

السيد اللي كان وجه من الوجوه الكئيبة ديال القناة الاولى ايامات سنوات الرصاص بصوته الكئيب الرتيب كايقرا من ورقة ف اخبار الحداش د الليل اللي ماكيشوفها تا واحد وكانو المغاربة كايشدو بها النعاس و اللي ف اصغر نقاش  وخلاف بينو و بين المسؤولين ديالو ناض باع كلشي و بدل مواقفو من مدافع عن الروايات الرسمية و “صحفي قاريء من الورقة بلا مجهود “الى مناضل و  معارض للسياسات الرسمية ف الاعلام زعما ..بدا الابتزاز باصلو الصحراوي  وانه من كفاءات المنطقة د كلميم واد نون وخا هي منطقة مادخلاش اصلا ف نزاع الصحراء.. والا كانت الكفاءة و الصحافة هي تقرا  فورقة بصوتك الرتيب فراه هادشي حتى تلاميذ الاذاعة المدرسية كايديروه..ووخا تضامنو معه الناس محترمين و حقوقين معروفين فصراعه مع مسوؤلي القناة الاولى  ف البدايات نكر كلشي و مشا شد اللجوء  ف فرنسا و دار موقع تالف لا ساس ليه ولا راس  و المثير للضحك مسميه باسمو العائلي.. والعجيب عندو بطاقة صحافة باسم هاد الموقع من وزارة الثقافة و الاعلام المغربية وخا كايضل يسب و يوصف المغرب ببلد الاحتلال..

السيد ناض دار حوار بصفته لاجيء صحراوي في فرنسا و عاطيها للكذب واولها ان ياسين المنصوري عضو ف الوفد المغربي و هادشي كذب، البلاغ الرسمي لوزارة الخارجية المغربية مافيه تا اشارة من هاد النوع و اعضاء الوفد باينين و اللي حارق الجزاير و البوليساريو هو وجود صحروايين منتخبين فيه حيث كتضرب ليهم ف الفكرة ديال الاحتلال و انهم بوحدهم الممثل الشرعي للصحراويين..وزايدها السيد بالدفاع عن الفكرة الجزائرية القديمة ديال انها ماشي طرف ف الصراع، وخا العالم و حتى الجزايريين براسهم عارفين انها هي اللي كتصرف على البوليساريو من قديم الزمان سلاحا و دخيرة و اعلاما، و المخيمات كاينة ف التراب الجزائري و قيادات الجبهة ساكنين ف مدينة تندوف الجزائرية وعندهم باسبورات جزايرية..و الجزائر هي اللي كتخلص اللوبيات اللي كتدافع على البوليساريو وهادشي موثق  عند الامم المتحدة و الاتحاد الاوروبي..كيفاش زعما صحفي عندو عقل وشوية الفكر النقدي ينفي مطلقا تورط الجزاير ف هاد النزاع؟ الا ادا كانت سميتو الراضي الليلي و كما وافق يكون وجه بئيس كئيب من قناة الاولى الرسمية راه ساهل يكون وجه للطرف الاخر..زعما غير مستغرب كيفما بصمتي بالعشرة على اطروحات المخزن راه ساهل تبيع للطرف الاخر..و اللي قلبو على البلاد و عندو مباديء وخا ينتقد المسؤولين ماعمرو يبيع راسو للجهة الاخرى..وهدا درس حتى للناس ديالنا ف الرباط..

درس للناس  ف الرباط اللي كاشجعو عديمي الموهبة و المباديء  والمتصلقين و المطبلين و المتسلقين..السيد كان  معلم ف وزارة التربية الوطنية  و يقدر عجب ف التسعينات شي واحد فقط  لان صوته رتيب، و دخلو للتلفزة و ماقدرش يمشي بعيد فيها  من غير تقديم اخبار الليل، ورغم ان اسمو بان فلوائح الموظفين الاشباح ديال وزارة التربية الوطنية بقا كايتخلص منها و يتخلص من التلفزة، و رغم ذلك السيد ثيق بصح انه صحفي ومشا لقناة ايرانية فعز الازمة الي كانت بين المغرب و ايران وهنا كايبان معدنو الحقيقي، خدم فيها جوج سيمانات قالو ليه على سلامتك، لا صوت ولا صورة و لا ثقافة عامة ، شنو  يقدر دير قدام المساخط الاعلاميين اللبنانيين القافزين اللي معمرين القنوات ف المشرق؟ السيد بصنطيحته اللي كنحسدوه عليها و هي الموهبة الوحيدة اللي عندو رجع للبزولة ثاني د القناة الاولى بعدما طرداتو قناة العالم الايرانية اللي كتروج للدعاية الايرانية..خلاف بسيط بينو و بين المديرة ديالو طلع لفرنسا وقال ليهم انا معارض صحراوي.. ماشي تا خلاف بل خطأ مهني، السيد قرا عناوين اخبار ماعطاوهاش ليه  جابها من راسو..وحتى فهاد الكاريير  ديال  معارض مغاديش ينجح فيها حيث ماعندو مبدأ وحيث عديم الموهبة ف الميدان تاهو بكل بساطة..

كيف نسي هاد السيد وهو سنوات كايطل على المغاربة وكايقول ” التحق بارض الوطن فلان و فلانة و  الوطن غفور رحيم و الصحراء مغربية  ومشا دار تغطية باسم القناة لمفاوضات مانهاست و دابا بوجه صحيح كايجي يقول ف حواره ” السمارة و العيون المحتلتين” وهو كايظل يعيش فيهم و يسافر ليهم ، فين بان ليه هاد الاحتلال وهو الصحفي زعما ؟ نتسناو يبين لينا هاد مظاهر الاحتلال ف شي مقالة او ربورتاج مصور؟واش كاينة شي دولة محتلة شي بلاصة اخرى و كتصرف عليها الملايير و سكانها عندهم نفس الحقوق و نفس الواجبات ..السيد عارف انه وخا كايدير هاد البهلوانيات البوليساريو براسهم عمرهم يثيقو فيه وعارفينو كايقلب على موطيء قدم عندهم  و الا كان كفاءة بصح علاش مايقدر ينجح ولو موقع الكتروني صغير ؟ياك يا الكفاءة؟  ولكن راه كما قلنا اللي باع راه  يبيع ديما ..و راه اصلا غير مستبعد انه غذا الا عيطو ليه للقناة الاولى ثاني يقدم “شي خبيرات وهو يقرأ من ورقة”  راه غادي يبدل الوجه ثاني و يبدا من جديد سمفونية التطبيل و التعريص للعرايشي و البارودي..

 

موضوعات أخرى

16/12/2018 08:00

والي جهة العيون باغي يشعل القَبَلِية فالصحرا. ها كيفاش بغا يتحكم فمهرجان الفيلم الوثائقي لي غادي يدار فالعيون وكيفاش فرض ولاد عمو صحة على المركز السينمائي