سهام البارودي-كود

//

واش الدين كايوكل طرف ديال الخبز؟
-الدين كايوكل طرف د الخبز و كايدير ليك تا الدار و الطوموبيل و يسفرك لبرا دوز ليفاكونص واكل شارب ناعس … غي خاصك تعرف كيفاش.
البابا فرونسوا د الكنيسة الكاثوليكية كان قال واحد الهضرة ف2014 لي خلقات ضجة كبيرة فالعالم فاش انتاقد ” الفراغ الروحي” لي كاتعاني منو الكنيسة ! و قاليهم بلي رجال الدين فالفاتيكان كايعانيو من ” الزهايمر الروحي” علاش هادشي؟ حيت لاحظ بأنه الأغلبية ديال رجال الدين الكاثوليك ولاو مضاربين على المناصب فالكنيسة و مقابلين الفلوس و مراض بالتناقض بين الخطاب لي كايروجو و نمط العيش لي كايعيشو !و النرجسية لي كايعيشو فيها خلاتهم يكونو بعاد على الروحانية ديال الدين.

تفكرت هاد الهضرة مؤخرا فاش شفت بلي “داعية اسلامي” ولات مهنة من لا مهنة له ! و الدين ولا وسيلة للإغتناء ! و بنادم بصح داير بيه لاباس بالمقابل واحد الفراغ روحي خطير عند الناس، و لاكانو رجال الدين الكاثوليك كايتسابقو على المناصب فالكنيسة و الفلوس و الشهرة ! حتى حنا فالعالم الاسلامي عندنا رجال دين كايتسابقو على الفلوس و الشهرة غي هوا النصارى لقاو البابا يجبد ليهم ودنيهم و يفكرهم شوية بلي الدين راه فيه جانب روحاني مهم كاينساوه و دياولنا عاثو في الأرض فسادا و ماكاين لي يدوي معاهم طبعا ! و تقدر تدخل للبروفيل ديال بزاف ديال الناس لي كايسميو راسهم داعية و لا مقرئ من المعروفين عندنا فالمغرب و غاتلقا سي الداعية هاهوا مسافر لمدريد ! ها هوا مسافر لجونيف ! ها هوا يحيي أمسية دينية ففرانكفورت و كلشي هادشي فإطار الدعوة، و فاش كاتدخل للفايسبوك ديال أي داعية غادي تكتاشف بلي بصح الدعوة سلعة مشية و خدامة و عليها الطلب داخل المغرب و خارجه.
! الداعية فهاد الوقت ولا فحال شي روك سطار ! هاداك كايحيي الليالي الدينية فالعواصم الأوروبية و لاخور كايدير السهرات الموسيقية تاهوا فالعواصم الأوروبية ! الروك سطار كايدير الشوو ديالو قدام الناس و كايخلصو باش يتفرجو فيه و الداعية تاهوا كايدير الشوو ديالو قدام الناس و كايخلصو باش يشوفوه ! هي هي ! غي واحد خدام بلحيتو و لاخور خدام بشعكاكتو ! لاخور كايحرك يديه و عينيه و يعاود النكت وسط شي طبلة ديال الرجال فشي سبوع ! و لاخور كايحرك راسو و كايتحير وسط شي كونصير فشي فيستيفال ! هاداك مسلح بگیتار كايغني بيها و لاخور مسلح بمعلقة باش كايلگم كسكسو ديال الزرود و العراسات !
“الدعوة” ولات carrière ! و الشيوخ ولاو des carrièristes ! كايديرو الفلوس و الديور و الطوموبيلات و كايسافرو و يفوجو بالدعوة ! شحال هادي كان بنادم كايقرا باش يخدم فشي وظيفة و لا فشي شركة ويدير الفلوس دابا ماتحتاجش الوظيفة ! تقدر تخدم ديال راسك و دير داكشي ديال المقاولة الذاتية في إطار الدين و دخل منها فلوس صحاح ! ماتخلص لا الكرا ديال شي لوكال و لا بيرو ! لا ديبلوم ! لا “مقاولتي” تعاونك ! لا إطار قانوني ! ماتخلص لا الضريبة على الشركات و لا ضريبة على الدخل كلشي ديالك حلالا طيبا ! مقاولة دينية تخدم فيها حر ديال راسك ماغايصدعو ليك راسك لا ضرائب لا خدامة لا نقابات ! نتا هوا الباطرون و نتا هوا الصالاريي و نتا هوا النقابة! و قد ما قدرتي كداعية تخلق لراسك واحد الصورة مميزة على الدعاة الأخرين التقليدين ! و قد ما قدرتي تلوح كليمات فيهم واحد النوع ديال الجرأة بالمقارنة مع الدعاة التقليدين قدما السلعة ديالك غادي تباع و تشهر و يوليو يعرضو عليك الناس للزرورات و السبوعات و العراسات دير ” الدرس”.
هادشي كايخليني نسول راسي واش ماكاينش واحد التناقض فاش كايولي الدين مهنة كاتاكل بيها طرف د الخبز و فنفس الوقت معتقد ؟
واش مسألة أنه الدين يولي وسيلة للاغتناء ماشي شي حاجة خطيرة على العقل البشري؟
هادشي كايخليني نفهم علاش بزاف ديال الفقها و الشيوخ ماكايحملوش تنتاقدهم و لا تقرب ليهم و لا تحاول تنتاقد داكشي لي كايقولو ! حيت طبيعي جدا واحد واكل طرف د الخبز بواحد مجموعة ديال الافكار كايسوقها ماغايحملكش تنسف ليه دوك الافكار !
ترزيه فطرف د الخبز ديالو ،القضية ماكايبقا فيها لا تدين لا روحانية ! القضية كاتولي معركة على الخبز و الگرمومة و لا شيء غير الگرمومة.