كود الرباط//

روينة نايضة وسط طلبة الطب وطب الأسنان والصيدلة، بسباب التخوين والترهيب النفسي لي كتمارسو أقلية باسم النضال ضد الأغلبية لي بغاو يكملو قرايتهم ويساليو العام في سلام، مور كثر من 6 شهور من الإضرابات المتتالية.

تسجيلات صوتية اطلعت عليها “كود” منسوبة لبعض طلبة الطب، كيتهمو فيها خوتهم الطلبة اللي قررو يرجعو يقراو ويقبلو بالعرض الحكومي، كيتهموهم بالخيانة وبأنهم “وليدات رطاب”. زعما هوما واعرين وحرشين، كأن “الرجولة والشهامة” هي تبقا بلا قرايا ويضيع العام.

دبا الوزارة قررت يكونو الامتحانات مور العيد، بعد معاناة كثيرة وإضرابات نهكات الدولة وكلفاتها فلوس كثيرة.

القرار ديال مراجعة دفاتر الضوابط البيداغوجية الوطنية الخاصة بعدد سنوات التكوين من 7 سنوات إلى 6 سنوات بالنسبة لتكوين دكتور في الطب، مع توسيع نطاق التداريب لتشمل المراكز الاستشفائية الجهوية والإقليمية والمؤسسات الصحية التابعة للقطاع الخاص بالإضافة للمراكز الاستشفائية الجامعية. هو السبب فهادشي كامل.

طبعا أول المتضررين من هادشي هم عائلات “أطباء” ملايرية باغين ولادهم يكملو قرايتهم ففرنسا غالبا باش فاش يرجعو يفتحو ليهم كلينيكات ولا يخليوهم يخدمو ف أوروبا لي فيها صالير مزيان. وثاني المتضررين من تقليص الدراسة هم الإسلاميين لي حتا هوما كيصيفطو ولادهم للخارج.

قرار تخفيض سنوات الدراسة هو قرار سيادي خصو حماية من الحكومة وخاص كذلك الامتحانات يدوزو بيخير وماشي بعيد تطلب الوزارة والكليات من السلطات الأمنية تحضر للامتحانات باش تأمنها ضد “بلطجة” البعض المحسوبين على لجان الكليات.