كود – عثمان الشرقي//

ماشي بالصدفة اختارت وكالة ناسا الاسم ديال “أرتميس” فرحلتها للقمر، حيت أرتميس فالميثولوجيا الإغريقية هي التويمية ديال أبولو، زيد عليها أنها إلهة القمر والصيادة والطبيعة والخلا، الربط بين أبولو وأرتميس جا مقصود، حيت أبولو كيرمز لأول وصول للقمر، وأرتميس كتمثل الرجوع له ولكن هاد المرة بنية البقاء ودگان لوتاد.

أرتميس فالميثولوجيا الإغريقية كانت إلهة العذرية والخصوبة وكتحمي دراري الصغار، وكانت من أقدم وأقوى الآلهة الأولمبيين حيت هي بنت زيوس كبير الآلهة وكانت هي الإلهة ديال العيالات (الأمازونيات) أما عند الرومان سماوها ديانا.

أرتميس كانت كتعيش حتى على الحيوانات فالطبيعة، وكانو الغزلان والماعز والخرفان مقدسين عندها داكشي علاش الإغريق كانو كيدبحوهوم لها باش يرضيوها.

وأشهر أسطورة عليها هي قصة أغامنون قائد الجيش الإغريقي فحرب طروادة مني قتل غزال فالغابة المقدسة ديال أرتميس الشي لي خلاها تغضب وتعصب وهي توقف عليه الريح وبقى الأسطول ديالو واحل فالبحر شحال من نهار وما قدرش يخرج حتى ضحّى اغامنون ببنتو إيفيجينيا باش ترضى عليه أرتميس كيف ما شرطات .