كود – وكالات//

أكد مجلس إدارة المعهد العالم العربي فباريس اليوم الثلاثاء باللي تعيّنات الدبلوماسية آن-كلير لوجوندر رئيسة جديدة للمؤسسة، كيلر ولات أول مرا كتشد هاد المنصب من نهار تأسس المعهد.

وجا فبلاغ خرج من المعهد مورا اجتماع مجلس الإدارة، أنه باقتراح من الدولة الفرنسية تعيّنات آن-كلير لوجوندر عضوة فالمجلس، ومن بعد تصوّت عليها وتنتاخبات رئيسة للمعهد.

وقبلها بشوية، كان وزير أوروبا والشؤون الخارجية الفرنسي، جان نويل بارو، صرّح باللي لوجوندر عندها التجربة والكفاءة والرؤية الاستراتيجية لي خاصين باش تتحمل هاد المسؤولية الكبيرة، ملي علن باللي غادي يقترح اسمها على مجلس الإدارة باش يعينوها رئيسة جديدة.

لوجوندر عندها 46 عام، وهي دبلوماسية كبيرة، وخدامة دابا كمستشارة فالرئاسة الفرنسية مكلفة بملفات شمال إفريقيا والشرق الأوسط، وسبق ليها كانت الناطقة الرسمية باسم وزارة الخارجية.

وزاد المعهد وضّح باللي مع اقتراب الذكرى الأربعين ديالو، الرئاسة الجديدة غادي تركّز على إصلاح كبير، فيه تجديد طرق التسيير، وتنظيم مزيان، وتصحيح الوضعية المالية باش تولي مستقرة، وتقوية أخلاقيات العمل وسط المؤسسة.