كود ـ وكالات//

مجتبى ولد آية الله علي خامنئي، تعرّض لإصابة خايبة فالحرب اللي دايرة دابا فإيران، وهادشي بان اليوم بعدما تعين كأعلى زعيم جديد للبلاد حسب جريدة الدايلي ميل .

مجتبى لي عندو 56 عام، هو الولد الثاني لآية الله خمانئي، ماكانش فالقائمة ديال ثلاثة علماء كبار اللي مرشحين للحكم، ولكن نهار الأحد تعين كخليفة بعدما صوت عليه مجلس الخبراء لي فيه 88 شخص من المسؤولين فالنظام. وسبق لواشنطن دارت عليه عقوبات اقتصادية وقالت بأنه كيحكم من تحت الجلابة بالتخبية بلا ما يبان بزاف.

مجتبى لي تقتل باه ومرتو فالهجمات الأولى ديال الحرب، باغا إسرائيل تصفيها ليه من بعد ما هددات بقتل أي واحد يجي مورا آية الله، فالتلفزة الإيرانية الرسمية قالو عليه “مجروح” فالحرب، وكايستعملو الكلمة “جانباز” باش يوصفوه، ولكن ما شرحوش كيفاش تضرب، الإعلام قال بلي مجتبى كيهضر بالإنجليزية، وقرا شوية ديال علم النفس، وعندو معرفة بالتكنولوجيا الحديثة، العلوم العسكرية، الأمن، والسياسة، وحتى بمتطلبات الدولة التنفيذية، كيف ما قرا فمدارس دينية محافظة فمدينة قم.

مجتبى عندو علاقات قوية مع الحرس الثوري الإيراني، واختارو مجلس الخبراء “تحت الضغط ديال الحرس الثوري”، حسب وسائل الإعلام الإيرانية، الوراثة من الأب للولد ماشي مقبولة بزاف وسط العلماء الشيعة فإيران، ومجتبى ماكانش عندو منصب رسمي  وما عمرو خدم فشي وظيفة سياسية مهمة، وحتى باه كان معارض لفكرة توليه حيث كيشبه للحكم الوراثي اللي دارو الشاه قبل الثورة الإيرانية ديال 1979.

ولكن دابا مني تعين كزعيم، غادي يبغي ينتقم للموت ديال باه، حسب خبير إيراني لي قال لبي بي سي: “هو باغي الانتقام، قتلوا باه وما غاديش ينسى، إلا ما قدرش ينتقم من مريكان، غادي ينتقم من الناس العاديين، تقارير كتقول أن عندو ثروة كبيرة فايتة 100 مليون جنيه إسترليني، وعندو ممتلكات فشمال لندن وبنوك فبريطانيا وسويسرا والإمارات وليشتنشتاين.

https://www.dailymail.co.uk/news/article-15628045/Irans-new-Supreme-Leader-wounded-Ayatollah-Khameneis-son-sustained-mystery-injury-claims-state-TV.html?ito=social-facebook-video&fbclid=IwdGRjcAQbf1hleHRuA2FlbQIxMQBzcnRjBmFwcF9pZAwzNTA2ODU1MzE3MjgAAR5EZ34xupQHJ5Z68dFe-vxI6U8jJDSAXEJ0Bipb0Wj23ZTW0dezcTQQpfBkAA_aem_-tBMj3K70WPIYIjQCkU18A