كود – وكالات //

كشفات وسائل إعلام أمريكية، نهار السبت، على هوية مساعد البيلوط المتهم بطعن شيفور الطيارة التابعة لـ«فلاي دبي» واللي كانت غادية لإسرائيل الأربعاء اللي فات.

وحسب شبكة «ABC» الأمريكية، الگريسون هو العُماني همام الهمامي، اللي اعترف فالتحقيق بأنه كان ناوي يطيّح الطيارة وسط الأراضي الإسرائيلية.

النائب العام ديال الإمارات قال بلي الهمامي تعدا على قائد الطائرة باستعمال الفاس ديال الطوارئ، وحاول يسيطر على أنظمة قيادة الطائرة، كيف ضاف أن التحقيقات مازال مستمرة باش تكشف جميع الملابسات والدوافع اللي كانت ورا الحادث اللي وقع.

مصادر مطلعة على التحقيق قالت لشبكة «ABC» بلي الخدمة السابقة ديال الهمامي فشركة «الطيران العُماني» سالات من بعد الاشتباه فأنه متطرف,وحسب نفس المصادر، الهمامي غايتعاون مع المحققين فالإمارات، فواحد التحقيق اللي غادي تشارك فيه إسرائيل وفق التقارير.

و نقلات شبكة «CNN»، أن الهمامي مواطن عُماني تزاد فالإمارات من أب عُماني وأم سورية، وعاش جزء من حياتو تما وعندو 29 عام.

من جهتها، قالت قناة «العربية» السعودية بلي  الهمامي ولى متطرف مني مشا لسوريا، ونقلات  «العربية» أن السلطات العُمانية كانت عارفة بأنه كيتبنى أفكار متطرفة،

وحسب منصة «لينكدإن» خدم الهمامي فـ«الطيران العُماني» لمدة سبع سنين، قبل ما يخرج من الناقل الوطني العُماني ففبراير 2025.

ومن بعد، التحق فـيونيو من نفس العام بـ«الخطوط الملكية المغربية»، ولكن بقى فيها غير ستة شهور سطاج وخرج فـيناير 2026.

وحسب «ABC»، كانت السلطات لقات عند الهمامي، فـ2024، ملي كان خدام كمساعد طيار فـ«الطيران العُماني»، «مواد متطرفة» وعلى هاد الأساس صيفطوه يخدم فشي بيرو قبل ما يجريو عليه.

وكانت السلطات السعودية علنات نهار الخميس نقل الهمامي للإمارات، مع قائد الطائرة الهندي.

وحسب تقديرات المؤسسة الأمنية الإسرائيلية، الهمامي تصرف بوحدو وبمبادرة شخصية.

ومن جهتها، نقلات وكالة «أسوشيتد برس» عن مصدر مطلع على التحقيق أنه ما كاين حتى الآن حتى دليل كيربط الهمامي بإيران.

وقال دبلوماسي خليجي بلي المحققين كيقلبو دابا واش الهمامي تصرف بوحدو، ولا عندو شي ارتباط بجماعات متطرفة.