كود سبور //

الكازاخستاني ميخائيل شايدوروف الملقب بـ“إله القفز الرباعي‘‘ دخل تاريخ الألعاب الأولمبية بعدما ربح الميدالية الذهبية فمنافسات فردي الرجال فالتزلج الفني فدورة الألعاب الأولمبية الشتوية ديال ميلانو كورتينا 2026 وخا فعمرو غير 21 عام،  هاد الرباح كان  فمفاجأة كبيرة، حيث ما كانش شايدوروف من بين الأسماء المرشحة  للقب، ولكن دار عرض تقني وفني من داكشي الرفيع، خلاه يطلع لبوديوم، ويهدي بلادو أول ذهبية أولمبية فالتزلج الفني فالتاريخ ديالها.

المسار ديال شايدوروف ما كانش ساهل، حيث بدا كيزلݣ وهو صغير، وجرّب حتى الجمباز الفني قبل ما يرجع للثلج، نقطة التحول فحياتو كانت فـ 2015، ملي تأثر بالنجم الياباني يوزورو هانيو، اللي ولى القدوة ديالو فالتوازن ما بين التقنية العالية والتعبير الفني، وهو التوازن اللي كيعتبره شايدوروف أساسي فالتزلج الفني العصري.

تقنياً كيتميّز شايدوروف بالتنقاز الثلاثي والرباعي، ودار إنجازات عالمية مسبوقة خلات اسمو يرتبط بالتجديد فالتزلج الفني، وولات حركاتو كيقلدوها حتى احسن المتزلجين فالعالم. هادشي لي خلاه يربح الذهب الأولمبي فميلانو كورتينا.

https://www.olympics.com/fr/milano-cortina-2026/actualite/mikhail-shaidorov-champion-olympique-patinage-artistique-jeux-olympiques-hiver-milano-cortina-2026-presentation