الرئيسية > آراء > شكون هوا هاد حسن الكتاني لي كايسول عباد الله واش يؤمنون بالقرآن الكريم ؟! واش سوقك آ سيموحمد ؟سوقك ؟! وواش هادا سؤال كايسولوه الناس فالفين و عشرين ؟!
09/11/2019 19:00 آراء

شكون هوا هاد حسن الكتاني لي كايسول عباد الله واش يؤمنون بالقرآن الكريم ؟! واش سوقك آ سيموحمد ؟سوقك ؟! وواش هادا سؤال كايسولوه الناس فالفين و عشرين ؟!

شكون هوا هاد حسن الكتاني لي كايسول عباد الله واش يؤمنون بالقرآن الكريم ؟! واش سوقك آ سيموحمد  ؟سوقك ؟! وواش هادا سؤال كايسولوه الناس فالفين و عشرين ؟!

سهام البارودي – كود//

هاد السمية ديال حسن الكتاني ماخافياش عليا ! فاش تفركت فين سمعتها رجعات بيا الذاكرة لاحداث سطاش ماي ! السيد كان من الناس لي تحاكمو فدوك الاحداث و خرج مورا مادار شي بركة ديال ” المراجعات” ماعليناش!
هاد السيد ” المراجعات” ديالو مامنعاتوش انه يحارب الحداثة و الحريات الفردية و مايبخلش علينا فالصفحة ديالو فالفايسبوك بشي خرجات بهلوانية !

آسمع آ سي الكتاني ! من أنتم ؟! باش تخرج تسول عباد الله ” هل انتم مسلمون ؟” ” هل تؤمنون بالقرآن ؟” ! آ الرجوع لله آ سي الفقيه ! ياكما تخالط ليك المغرب مع افغانستان و لا ياكما نصبتي راسك قاضي و لا مسؤول علينا بلا خبار المخزن ؟!

وا دابا شوف هاد الناس لي عايشين معانا ف2020 كي دايرين ؟ المواطنين الصالحين كايتقاتلو على الحقوق و الحريات الفرية و ضمان كرامة المواطن و هاد السلفيين مابغاوش يحشمو حالفين تايردونا قرون للوراء. مابغاوش يفهمو بلي الدين هوا مسألة شخصية ! و بلي ماعند تاشي واحد الحق باش يتدخل فعلاقة الانسان بالله و لا بلاعلاقتو بيه ! الدولة براسها خاصها تتخلص من گاع القوانين القروسطية لي كاتخليها تتدخل فالحياة الشخصية للمواطن كأي دولة حداثية باش تتفرغ لتنظيم حياة المواطنين بشكل اكثر عقلانية و تضمن لينا الرخاء و الكرامة !

مابغيناش حنا لي يجي يسولنا ” هل انتم مسلمون ” ! و مابغيناش نسولو بعضياتنا ” هل انت مسلم ؟” ! بغينا لي يسولنا واش واكلين مزيان ! شاربين مزيان ! قارين مزيان ! مهليين ! فاش كاتمشيو للسبيطارات كاتلقاو العلاج ! فاش كاتقلبو على خدمة كاتلقاو المشاريع و الاستثمارات فين تخدمو !

راه غي فالدول لي خارية عليها الوقت لي الناس كايسولو بعضياتهم على الدين و كايتعاملو مع بعضياتهم على اساس الدين ! مسلم او غير مسلم و من بعد ؟! واش غايمنعنا هادشي اننا نبينيو دولة و نعيشو فيها كمواطنين احرار ؟! طبعا لا آ سيموحمد ! السؤال ديالك ماعند دينمو تامعنى من غير فالفكر ديالك لي كايقسم الناس لمسلم و كافر !

آ سيدي سطوب ! حبس علينا هاد المرقة البايتة ! البلاد مامحتاجاش طبقة ايكليروس دير لينا محاكم التفتيش و تدخل معانا لديورنا ! الاسلام و الايمان و الدين خليه فدارك بينك و بين لي خلقك ! و خلي الناس لي باغا تبني دولة مدنية حقيقية تدافع على القيم لي كايتأسسو عليها الدول.

الدين ديال الناس ماشي سوقك ! واش سمعتي ؟ ماشي سوقك

موضوعات أخرى

17/11/2019 17:30

سكوب. ها قصة فيديو يوتيوب اللي فيه اتهامات خطيرة بزاف لمسؤولين أمنيين. بطله مكحلها وروشيرشي فجرائم ثقيلة تجبدات فيها لملايير

17/11/2019 16:00

سبعة ديال الحوايج كايخليوك تكره تتعامل مع اغلب الحرايفية ! كانتعامل مع شي حرايفي و لا شي صنايعي كانكحل بالعما حيت ماكايحتارموش الوقت و ماكايتقنوش الخدمة ديالهم ! واش كلكم فحالي و لا غي بوحدي ؟