اسماء غربي-كود//
واحد المهرجان فارغ سميتو منتدى شباب العالم دارتو مصر باش تبيض صورة نظام السيسي اللي قامع الشعب و لاح المعارضة ف الحباسات من صحافة و سياسيين …و اللي رد مصر حبس كبير بعد افشال ثورة الشباب ورد الحكم العسكري…هاد المهرجان غادي تدار الدورة الثانية ديالو ف هاد السيمانة و كالعادة مشاركين ف التمويل الامارات و دول الخليج
و فنهاية هاد العجب اللي هو عبارة عن تجميع لشباب من بعض الدول ،و اللي كايبقا السيسي يخطب عليهم خطبه اللي مكيفهما تا واحد و شي اربع ايام ديال السياحة ف شرم الشيخ، بينما الشعب مالقا ماياكل و الشباب ف زنازين التعذيب ديال أمن الدولة، غادي تدار اغنية ملحمية او اوبريت كما كايسميوها ف مصر مشاركين فيها بزاف د الفنانين بحال كارمن سليمان و عادل عبد الرحمن وكلهم من الفنانين المرتزقة ديال لبنان و الخليج…
العجيب ان منظمي المهرجان اعلنو ان فنان مغربي غادي يشارك و كتبو اسمه وهو امين التموي و اللي صرح انه سعيد و فرحان بتمثيل المغرب فهاد التظاهرة و بلا بلا..اسيدي مثل غير راسك ماتمثلش المغرب
بعد البحث ، تبين انه لاوجود لشي فنان سميتو أمين التموي ، غالبا كايقصدو هاد الناس هو امين التمري وهو الاسم الحقيقي ديال أمينوكس.. واش هو ولا لا؟ الايام غادي تبين و في انتظار شي توضيح من عند المانجر ديالو.