سعيد الشاوي كود الرباط ////

فظرف سيمانة مكاملاش، فاقت بلادنا على جوج فواجع خلفو وفيات وإصابات ثقيلة.. كل واحد وكيفاش مات. الحدثين مختلفين وكل واحد فمدينة، ولكن بجوجهم بسبب شبهات الفساد والرشوة والتقصير..

فاجعة فاس:

هاد الكارثة اللي ماتو فيها 22 واحد وتصابو فيها 16 خرين بجروج متفاوتة الخطورة أسبابها خارجة منها ريحة الفساد والرشوة. علاش؟. المعلومات الأولية ديال البحث لي مازال متواصل بتعليمات من النيابة العامة كتشير باللي جوج بنايات طاحو حقاش كاين بناء عشوائي.

كيفاش هاد البني العشوائي؟ وشكون نحسابو؟ أكيد تحديد المسؤوليات غادي تكون فهاد الفاجعة ومغاديش تدوز مرور الكرام، حقاش مصادر مطلعة كانت أكدت باللي هاد البنايات مكونة من 4 طوابق لكن التصاميم والرخص اللي كاينة كتسمح غير بجوج طوابق. كيفاش طلعو جوج آخرين؟.

فين كان الشيخ وفين كان لمقدم وفين كان القايد والباشا؟ وزيد عليها فين كان قسم الشؤون الداخلية بعمالة فاس فالوقت اللي طلعو جوج طوابق؟. مسؤولية السلطة المحلية تابثة. واش كان بعلمها هادشي. أكيد لمقدم غادي يكون شايف كولشي، وسط حديث على شبهات الفساد اللي خرجات ساكنة منطقة المسيرة بتصريحات خطيرة تتهم رجال السلطة بالرشوة. نساينو البحث القضائي شنو غادي يكول فهادش الكارثة.

فاجعة آسفي:

مع قرب نهاية عام 2025 بأيام قليلة اهتزات عاود بلادنا على وقع فاجعة فيها حصيلة ديال الضحايا ثقيلة بزاف. آخر الأرقام هضرات على 37 واحد لي ماتو و14 آخرين فالعلاجات الطبية وفيهم جوج فحالة خطيرة ودخلهم لقسم العناية المركزة، وهادشي وقع فمدينة آسفي.

هاد الفاجعة وقعات بسبب الشتا الكثيرة والاستثنائية اللي عرفاتها هاد لمدينة الهادئة، وهاذ الشتا نتج عنها سيول فيضانية قوية وكانت مفاجئة للغاية. دبا السلطات العمومية والمحلية مزال مشاركين لحدود اللحظة فعمليات البحث الميدياني والإسعاف.

القاسم بين فاجعة آسفي وفاس. هو أن فاجعة العاصمة العلمية وقعات بسبب شبهت الفساد والرشوة لي خلاو عملية البناء تدار بشكل عشوائي، وأما فاجعة آسفي فهادشي يشتبه أنه وقع بسبب التقصير ديال المسؤولين المحليين.

الأرصاد الجوية كانت حذرات في أكثر من مناسبة بهادشي، كل ساعة كتدير نشرة جوية إنذارية. لكن كيفاش كيتم التعامل معاها من طرف المسؤولين؟. هنا إما يكون تقصير أو تفاعل إيجابي.

علاش فآسفي مكانش عمل استباقي؟. كان ممكن المسؤولين يخبروا الناس تدخل لديورها بسبب سوء الأحوال الجوية لي ضربات المدينة.

وزير الداخلية، عبد الوافي لفتيت، كان صيفط برقية عاجلة مؤخرا كتهم إحداث لجان اليقظة تحسبا لوقوع شي فيضانات لكن واش عامل إقليم آسفي طبق تعليمات الداخلية حرفيا؟. ثم واش ساكنة آسفي محكوم عليها بالإقصاء والتنمية لان واقع الحال اليوم يقول نعم لا بنية تحتية لا منتزهات لا مشاريع اقتصادية ولا سياحية مع معدلات مخيفة للبطالة