كود – كازا ////

تفجرات قضية مثيرة للجدل تورّطت فيها شركة طيران صبليونية، وكان ضحيتها مشجعون لمنتخب البنين، وذلك مباشرة بعد إقصاء منتخبها الوطني من كأس افريقيا اللي تنظمات فبلادنا.

المعلومات اللي حصلات عليها “كود”، من مصادر مطلعة، هي أنه بعد ما سالى اخر ماتش للبنين فالكان رجعو المشجعين بحالهم لبلادهم على متن طيارة صبليونية اللي كانت تكلفات بها وزارة الشباب والرياضة بدولة البنين.

وقالت مصادر “كود” باللي هاد المشجعين اللي العدد ديالهم 374 واحد مشاو بحالهم، وعدد منهم بقاو ليهم جوايجو فالمغرب. لكن علاش وشنو اللي وقع؟. فحسب مصدر “كود”، فإن الطيارة الإسبانية هزات شي حوايج وخلات الباقي عند شركة للمناولة تابعة للخطوط الملكية المغربية حقاش داك الطيارة كانت عامرة ومالقاوش كيفاش الطيارة تهز داكشي.

المصدر نفسو وضح ل”كود” بللي “لارام” ما عندها حتى شي علاقة نهائيا بهاد الموضوع، بل شركة المناولة اللي كتكلف بنقل لحوايج للطيارات هي تابعة لارام، وهاد الشركة في الأصل غير حطات داك الشركة الصبليونية عندها لحوايج حقاش مالقاتش كيفاش هز فالطيارة داك الحمولة الثقيلة.

دبا وفق مصادر “كود”، فإن شركة المناولة اللي سيمتها ” رام هاندلينغ” مزال عندها لحوايج وكل يوم كتسجل خطية على داك الشركة الإسبانية ديال الطيران اللي خلات ليها حوايج الناس وسمحات فيهم.

هاد الشركة الصبليونية، وفق مصادر “كود”، كان من المفروض عليه تشوف مع شي شركة طيران خرى لي غادي تدي داك لحوايج للمسافرين، وكان عليها تشوف لارام حقاش عندها خط مباشر من كازا للبنين لكن هي ماموسقاش كاع لحدود الآن.

دبا داك شركة المناولة اللي تابعة “لارام” كتسجل يوميا غرامات على شركة الطيار الإسبانية اللي قليل فاش كتجي للمغرب حقاش خلاّت ليها لحوايج محطوطين بلا متعاود ترجع موراهم او تلقا شي حل للمسافرين.