احمد الطيب كود الرباط//

صراع سياسي كبير على شكون غايربح انتخابات 2026 ويترأس حكومة المونديال بامتياز، والهضرة دايرا على صراع قوي بين قطبي الحكومة الأحرار والاستقلال، في ظل الضعف التنظيمي لي كيعاني منو حزب الأصالة والمعاصرة لي تهرس بملفات فساد وفضايح قياداته (منها فضايح ابو الغالي عضو القيادة الجماعية).

كواليس استقتها “كود” من مصادر حزبية، تفيد بلي البام رجع للور وكيوجد خطوة بخطوة، وخصو يبني شبكة علاقات وأعوان جدد، بعدما تهرسو ليه “المحترفين الكبار ديال الانتخابات” على رأسهم سعيد الناصري وبيوي وغيرهم لي تورطو فملف إسكوبار الصحراء، وزلزال الاعتقالات بجهة الشمال وفضايح فجهات اخرى.

في المقابل، نزار بركة، الأمين العام لحزب الاستقلال، رغم فشله في تدبير وزارة التجهيز والماء (شوفو غير بلاغات النقابات فهاد القطاع)، وحتى الأطر والمهندسين الكبار يتحسرون من التدهور التنظيمي والإداري فهاد الوزارة فعهد بركة، للي كيعاود قصة ديال 80 في المائة من الآبار ماشي مرخصة، واختلاسات المقالع، بلا ما يدير حتى خطوة فعالة فمحاربة الفساد فهاد القطاع. وزير ماشي كفاءة لقطاع الماء.

باش تعرفو بلي بركة فشل فتدبير قطاعو، مبغاش يتحمل المسؤولية فأزمة تهديد مدن الرباط وكازا بأزمة العطش، وحسب مصادر “كود” فراه حتى مشروع أوطورت الماء بين حوض سبو وحوض أبي رقراق مبغاتش وزارة بركة تحمل مسؤولية الإنجاز ورفضات تنخرط ف الأول، حتى خدا مدير الري بوزارة الفلاحة احمد البواري (للي دبا وزير الفلاحة فحكومة أخنوش 2) المبادرة ديال هاد المشروع وتنجز بسرعة قياسية.

فالحقيقة لي دارو مشروع الربط المائي وللي عتق مدن الرباط وما جاورها من العطش، هو البواري. ماشي بركة، وهادشي راه كاين فالعقد ديال المشروع.

يلا جينا نشوفو مثلا إنجازات بركة وإنجازات فاطمة الزهراء المنصوري، غادي تلقاوها إنجازات ضعيفة مقارنة مع باقي الوزراء بحال السياحة مثلا لي طلعات قافزا وتمكنات من تحقيق أرقام مهمة من مداخيل العملة الصعبة وغيرها.

في المقابل الأحرار كيعول على منجزات الحكومة الحالية برئاسة عزيز أخنوش، من أجل الفوز بالانتخابات القادمة، خصوصا وأنه تمكن ينزل برامج الحماية الاجتماعية 28 مرسوم تقريبا وكاع القوانين المهمة، كما يعول الأحرار على العالم القروي بفضل عدد من المشاريع لي استفدو منها سكان هاد المناطق المهمشة.

أمام الاستقلال كيعول فقط على الإرث ديال مكانة آل الفاسي والحظوة لي عند نزار بركة، الأمين العام للحزب، للي أصلا طلع ليه الجوك فاش طيح خصمو السياسي النعمة ميارة وشكل تحالف مع ابن حمدي ولد الرشيد وضعف قوة آل الرشيد فالتنظيم ونجح يدير لجنة تنفيذية بلا ميكونوش فيها قيادين متابعين فملفات فساد.

دبا بقات غير سنة على الاستعدادات المبكرة للانتخابات،  جميع الأحزاب أغلبية ومعارضة باغين يكونو فحكومة المونديال لي كيشوفوها “القنطرة” لي غاتبدل حياة البلاد والمغاربة وغاتكون ثورة فالبنيات التحتية والتجهيزات والخدمات.