كود هناء ابو علي ///

اليوم بدات شعارات باثمنة الغازوال ووصلات “اخنوش” ارحل”. هاد الشي ناشطين فيه بزاف الاسلاميين اللي خسرو فالانتخابات وخسرو حزبهم وخسرو. صعيب ينوضو منها. لكن الشعار ما جديدش فالعهد الحالي اي حكم محمد السادس.

لاحظو انو مع كل رئيس حكومة حسب الدستورالحالي والوزير الاول حسب الدستور السابق ل2011 كانت شعارات كتخرج ودعوات كتطلق. طبعا مع وجود وسائل التواصل الاجتماعي تغيرات امور كثيرة.

نبداو باليوسفي عبد الرحمان الكاتب الاول لحزب الاتحاد الاشتراكي اللي تعين وزير اول ف1998. دوز مع الحسن الثاني وبقى مع محمد السادس حتى 2002. فهاد المرحلة تحارب اليوسفي من الداخل. وصفوه بالانقلابي اللي باغي يناقلب على النظام وهاجموه فلوموند كيف دار مستشار الملك اندري ازولاي وطلقو عليه الصحافة واخا فعامو الاول وطالباتو بالرحيل. 

يعني بهدلوه بزاف. شي من المخزن وتزاد عليهم شي من اليسار. النتيجة انو وزير اول ربح الانتخابات من بعد ف2002 وجابو التكنوقراط ادريس جطو. مع جطو كان يعتقد المخزن جاب واحد من ولادو الامور غادية دوز مزيان. ابدا. باش ما تبعاتش المنهجية الديموقراطية٬ استمر نفس الخط اللي فالمخزن فالهجوم علي هاد الرجل. ظل بعيد على السياسة وماديها فالاقتصاد ولكن ما خلاو ما قالو فيه باللي ملايري جا يدافع على لملايرية بسياسة ليبرالية… وبعد ذلك خرجات فضايح بحال تحويل لوطوروت باش توصل لمشاريعو. فاللول كانت للوجيسيتك ودابا ولات عقارات للسكن. اتهمو وزير النقل للي كان كريم غلاب باللي دار تبديل فلوطوروت باش يوصل لمشروع جطو. توسخات السمعة ديالو

من بعد ربح حزب الاستقلال الانتخابات ف2007 وطلع عباس الفاسي. غادية تكرر نفس اللازمة ولكن بطريقة اخرى. يتحارب بزاف الوزير الاول ولكن كيفاش؟ هاد المرة بالهدرة على اخطبوط العائلة الفاسية. تشعباتها وعلاقاتها وسيطرتها على مفاصل الدولة. ترفع ضدو اكثر من مرة شعار “ارحل”. كان هو وزير اول وولد اختو الطيب الفاسي الفهري وزير خارجية وراجل بنتو نزار بركة وزير منتدب لدى الوزير الاول مكلف بالشؤون الاقتصادية والعامة ومرات ولد اختو ياسمينة بادو وزيرة للمرأة قبل ما تولي فالصحة وراجلها نيت علي الفاسي الفهري رئيس جامعة الكورة والمدير العام للمكتب الوطني للكهرباء والماء…

حكومة تسبات وتشوهات وتنظم عليها هجومات كتشبه لهجومات اليوم.

جا الدستور الجديد 2011 بعد احتجاجات 20 فبراير ووصل الاسلاميين للحكومة وطلع عبد الاله بنكيران رئيسا للحكومة. هنا غادية تخرج اتهامات جديدة لمول هاد المنصب. فعهدو وشوية فعهد العثماني من بعدو٬ غادية تخرج عبارات “اخونة الدولة”. اي الاسلاميين غاديين يخونجو الدولة وباللي ما فيهم ثقة وباللي خاص يمشيو فحالهم وكانت محاولات من اللول باش طيح حكومة بنكيران وشي ابو الهول خرج الاستقلال منها بعد ما جابو شباط وقضى علي تركة ال الفاسي فالحزب٬ ولكن كاينين العاقلين فالدولة وكان دخول التجمع الوطني للاحرار للحكومة وتنقدات. 

لكن التهم بقات هي والمطالبة برحيلها كانت هي. ديك الساعة ما كانش لوسائل التواصل الاجتماعي قوة اليوم. لكن المطالبة برحيلها كان قولا قبل الكتبة. 

اليوم كيتكرر الزمن. طلعات فاقل من عام شعارات “اخنوش ارحل”. يالله ربح الانتخابات ناضت جهات كتقول باللي ما خاصوش يكون رئيس حكومة واخا التجمع ربح الانتخابات. ثم بدا فتشكيل الحكومة ودخلات احزاب كانت معارضة ليه فالحملة بحال البام وتم استبعاد حليف بحال الاتحاد الاشتراكي. بدات الحكومة خرجات شعارات محتشمة فاللول على اخنوش ارحل”. دابا هاد الحملة خدات بعد اخر. طبعا فيها ان بحال كاع اللي دار مع رؤساء الحكومات اللي سبقو. 

المشكلة كتكرر. هادا منصب كيدرگ علي مول العود. ما يمكنش يبقى مولاه هاني. غير يدخل للمشور يوجد راسو للضرب من الداخل كثر من الخارج. الخارج غير كيوهموهم راه مهمين وصافي. الشرعية الشعبية ما يتسوق ليها حد.

الحل كان هدر عليه عبد اللطيف المنوني وعمر عزيمان مستشاري الملك فالذكرى 20 بتولي محمد السادس الحكم باش قالو لوكالة الانباء الفرنسية على الملكية البرلمانية على بلوغ هاد الشكل من الحكم.