وكالات//

هاد البريطاني سميتو دان ريتشاردز، عاود كتب قصة الأمل ديالو من جديد من بعد ما تعرّض لحادث مأساوي خلاه مشلول شلل كامل من العنق لتحت، مللي تضرب برمال شاطئ لانغلاند فمدينة سوانزي بسبب موجة قوية وهو كيغوص فليلة رأس السنة ديال 2023.

وبالرغم من أن الأطباء اعتابرو حالتو شبه ميؤوس منها، دان بدا رحلة علاج ماشي تقليدية، داتو لعيادة متخصصة فجنوب ويلز، فين استفد من تكنولوجيا معتمدة على الذكاء الاصطناعي، بحال بدلة ديال التحفيز الكهربائي فيها حساسات ذكية، وروبوتات كتحاكي طريقة المشي الطبيعية، الشي اللي ساعد على تنشيط العضلات ديالو بشوية بشوية.

وبموازاة مع هاد التقنيات، سافر دان من بعد لألمانيا باش يبدا علاج تجريبي بالخلايا الجذعية فالحبل الشوكي، وكيستعمل بدلة سميتها Hybrid Assistive Limb (HAL)، اللي كتقدر تحوّل إشارات الدماغ لحركة حقيقية، وهاد الشي خلاه يقدر يوقف ويمشي أولى الخطوات بمساعدة قليلة.

ورغم التكاليف اللي كانت طالعة، عائلة دان وأصحابو قدرو يجمعو التبرعات اللي خاصّة باش يكمل العلاج ديالو خارج البلاد، ودابا راه خدام باش يحصل على تأشيرة طبية أوروبية باش يكمل البرنامج العلاجي.

وأكد دان فتصريحاتو لشبكة BBC وقال: قبل عشر سنين، هاد الشي كان مستحيل. اليوم ولى ممكن بفضل التطور التكنولوجي. كل خطوة كنحققها دابا كتزيد تبني الأمل ديالي فغد أحسن”.