كود كازا ///

عرف مركز شرافات بجماعة بني دركول بإقليم شفشاون، أمس، واحد الواقعة غريبة اللي هزّت الرأي العام المحلي، بعدما وقع شجار عنيف وسط حافلة للنقل المدرسي كانت كتقل العشرات من التلميذات والتلاميذ.

وحسب شهود عيان، السبب فهاذ الشجار راجع لتصفية حسابات قديمة بين بعض التلاميذ، بحيث كانو شي تلامذ راكبين فالحافلة، وآخرين كانوا كيتسناوهم فالمكان اللي كتوْقف فيه الحافلة، وهاد الأخيرين كانوا مدعومين من طرف بعض أصدقاءهم اللي ماعندهم حتى علاقة بالمدرسة.

وغير وْقفات الحافلة، طلعو التلامذ المدعومين وهاجمو أربعة تلامذ آخرين وسط الحافلة، ووقع شجار عنيف بزاف. أحد التلاميذ تضرب فالرّاس، والآخر تصاب على مستوى الأنف، وعمّت الفوضى فالحافلة قبل ما يتدخلو بعض الحاضرين ووقفو النزاع.

السلطات المحلية دخلات على الخط، وتم نقل جوج تلامذ بسيارة الإسعاف إلى المستوصف المحلي، ومن بعد للمستشفى الإقليمي بشفشاون، بحيث كاين احتمال أن أحدهم تعرّض لكسر فنيفو.

نشطاء حقوقيون فالإقليم طالبو بفتح تحقيق نزيه وشفاف فهاد الواقعة الخطيرة، خصوصا وأنها وقعات وسط وسيلة نقل مدرسية كتجمع بنات وولاد، ماشي فشي زنقة ولا ساحة.

وأكدو أنهم كيعولو على القضاء والضابطة القضائية بشفشاون باش يكشفو كل الأيادي الخفية، خصوصا الناس اللي كيتبهاو بـ”النفوذ” فالقضية، لأن هاد النوع من السلوك ماخصوش يبقى يتعاود فالمؤسسات التربوية ولا فمحيطها.