كود -وكالات//

سرقة هوليودية وقعات فالعاصمة النمساوية فيينا، بعدما جوج شفارة دخلو لمتحف الفنون التطبيقية (MAK) بحالهم بحال الزوار، وهرسو الواجهة اللي كانت حامية واحد العقد ديال لماس غابر، وهربو بيه قدّام الناس.

الجوهرة المسروقة كانت ديال الأميرة نازلي، مرات الملك فؤاد الأول، وتصاوبات ف 1939 على يد دار المجوهرات الفرنسية الشهيرة Van Cleef & Arpels، بتصميم جاي من فن الآرت ديكو.

العقد فيه كثر من 600 ماسة، من بينها ماسات دائرية لامعة وماسات «باغيت»، مرتبة بطريقة كتشكّل تصميم على شكل أشعة الشمس.

القيمة التاريخية ديال العقد كبيرة، حيث الملكة نازلي طلبات تاج بحالو، بمناسبة زواج بنتها الأميرة فوزية من ولي العهد الإيراني محمد رضا بهلوي، اللي ولى من بعد شاه إيران.

البوليس النمساوي ما علنش على القيمة الرسمية للعقد، ولكن حسب بيانات دار المزادات Sotheby’s، سبق للعقد وتباع فـنيويورك قبل عشر سنين بـ4.3 مليون دولار، يعني 3.7 مليون يورو بالقيمة الحالية.

السرقة وقعات مورا جوج ديال العشية، قدّام عدد من الشهود، مني الشفارة هرسو الواجهة، وخطفو العقد وغبرو دغيا.