گود سبور//

شعلت فالقسم الثاني من البطولة الاحترافية لكرة القدم، على الطلوع للقسم الأول بسبب نتائج الدورة 25، ومن أبرز الخاسرين الكوكب المراكشي المتصدر، واتحاد يعقوب المنصور مول المركز الثالث واللي فريق مهدي بنسعيد وزير الشباب والثقافة والتواصل، والمستفيدين من هذه الجولة هما رجاء بني ملال وأولمبيك الدشيرة.

وخسرو الكوكب المراكشي، اليوم الاحد مع شباب أطلس خنيفرة بنتيجة 2 لواحد، وما قدروش الكوكب يستافدو من هذه الجولة وضاعت لهم 3 نقاط، وبقات عندهم 46 نقطة فالمركز الأول، والفارق بينهم وبين رجاء بني ملال اللي محتلين المركز الثاني ولى 2 نقاط، حيث الملاليين ربحو فنفس الوقت فريق شباب بنجرير بواحد لزيرو، وولت عندهم 44 نقطة.

أما اتحاد يعقوب المنصور المحتلين للمركز الثالث المؤهل لباراج الطلوع خسرو فتيرانهم اللي فحي يعقوب المنصور بالرباط مع أولمبيك الدشيرة المحتلين للمركز الرابع، وبقات عند يعقوب المنصور  41 نقطة، وضيعو فرصة أنهم يقربو من المركز الأول والثاني اللي كايطلعو نيشان للقسم الأول، وبالمقابل قربو منهم الداشيرة اللي ولات عندهم 39 نقطة.