كود سبور//

قدرو الرجاء الرياضي يرجعو بقوة فالمنافسة على لقب البطولة الاحترافية لكرة القدم، بعدما ربحو اليوم الجمعة الضيف ديالهم نهضة بركان فتيران برشيد فماتش مؤجل عن الدورة 27.

وسالا الماتش بين الرجاء الرياضي ونهضة بركان بنتيجة 3 لزيرو لمصلحة الفريق الاخضر، وماركا الهدف الاول للخضرا يسري بوزوق فالدقيقة 32، والهدف الثاني ماركاه عبد الله خفيفي فالدقيقة 69، والهدف الثالث رجع ماركاه يسري بوزوق فالدقيقة 82.

وبهاد الرباح رجعو الرجاء الرياضي بقوة فالمنافسة على لقب البطولة، وخداو 3 بوان رفعو بها رصيدهم إلى 63 نقطة فالمركز الثاني، وقلصو الفارق مع الجيش الملكي المتصدر بـ64 نقطة إلى نقطة واحدة، أما نهضة بركان تجمد الرصيد ديالهم عند 46 نقطة والفريق كيحتل المركز الثالث وهاد الخسارة كتزيد تكمل على جراح الفريق اللي يالاه خسر فينال كاس الكونفدرالية مع الزمالك المصري غير الاحد اللي فات.