كود ـ كازا//

قتلاتنا هاد النوعية ديال السياسيين لي كاينة فالبلاد. كيمارسو الشعبوية على أساس أنها سياسة حينت ما عارفين منين يجيو للسياسية ولا يعطيو شي إضافة في مجال التدبير لكونهم متأكدين من أنهم فاشلين.. وهذا النوع هو الكارثة الكبيرة لي كتهدد المغرب حينت مغادي تنفعك بوالو لكونها ما قادرة تقدم حتى إضافة وتفكيرها منصب فقط على رصيد شعبيتها لي كتبغي تبقى محافظة عليه لضمان مكانها فمشهد ولا مضبب حتى واحد مبقى حامل يشوف جيهتو.

ومناسبة هاد المقدمة، لي مافيهاش ولو ذرة تحامل بقدر ما هي حقيقة كيتحسر الجميع على عيشها حاليا، هو ما أثير حول تسعيرة دخول حديقة عين السبع للحيوانات التي جرى التصويت عليها خلال أشغال الجلسة الثانية من دورة فبراير، بجماعة الدار البيضاء.

فبدل أن نشهد نقاشات من مستوى آخر بشأنها وبشأن ما هو مبرمج أو قيد التفكير والتصور للخروج بالبيضاء من أزماتها وجعلها واحدة من المدن الأكثر جاذبية، خرج يوسف لحسينية، رئيس مقاطعة عين السبع المنتمي لحزب السنبلة، كيطالب، كاليك، بتدخل ملكي لإنقاذ الدار البيضاء من تغول مدير شركة التنمية المحلية الدار البيضاء للتنشيط والتظاهرات، حينت اعتامدات تسعيرة لا تتناسب، في نظره، والقدرة الشرائية للمواطنين لولوج هاد المرفق.

وأوضح رئيس مقاطعة عين السبع،الذي كان يتحدث صباح أمس الأربعاء في أشغال الدورة الثانية لدورة فبراير، أن مدير شركة التنمية المحلية “كازا إيفنت” تعامل باحتقار مع مطلب المنتخبين والساكنة بتخفيض رسوم الدخول للحديقة من خمسين درهما إلى عشرين درهما، وأن مدير شركة التنمية المحلية رد  على مطلب الساكنة في زيارة ميدانية لمرافق حديقة الحيوان  بالقول:«أنا ممبزز على حتى شي واحد باش يجي لحديقة الحيوان عين السبع».

دابا هادشي ما شي قمة الشعبوية الفارغة لي كتبكي. حتى ملي كيخرج مشروع تسايناتو الساكنة هادي سنوات، ضروري تلقى شي واحد باغي يركب عليه ويحاول يجذب من خلالو الأضواء ليه بطرح مطلب غبي، كيف هذا ديال تسعيرة الحديقة، لي دخولها بـ50 درهم مكيحتاجش لمزايدة، على اعتبار أنه ثمن معقول وكل واحد مخير بين يتوجه لهذا الفضاء ولا لا، فالمقابل كاينة شي حوايج ضرورية والسعر ديالها طالع السما ولا نجد أصوات سياسية تتحدث عنها ومخاليا الناس كتشحط وهي كتفرج فيهم بحالي ما مصوتينش عليهم باش يدافعو ويترافعو عليهم…

يذكر أن هاد المطلب ديال مراجعة تسعيرة الولوج إلى الحديقة كان رد مجلس الجماعة واضح عليه، بالاستقرار على تحديدها في الثمن المشار إليه لولوج هذا الفضاء، الذي كان يخضع لأشغال التهيئة، منذ سنوات.

وقد توزعت أثمنة الدخول إلى حديقة عين السبع بين 50 درهما للبالغين، و30 درهما للأطفال ما بين 5 سنوات إلى 12 سنة، و10 دراهم للطفل بالنسبة للمجموعات المدرسية.