كود -أگادير //

دارت شطاحة أرجنتينية نداء للمحسنين،من بعد ما نشرت نداء استغاثة طلبات فيه المساعدة باش تخوي المغرب وترجع لبلادها، وقالت بلي كتعيش ظروف صحية ومادية صعيبة.

وقالت ماريا أغيلار هالاك، اللي عندها 35 عام، إنها جات لمدينة أكادير فشهر مارس اللي فات بعقد عمل كشطاحة، وكتدعي أنها تعرضات لإصابة وهي كتشارك فواحد العرض، واللي سببات ليها مشاكل فالعمود الفقري وخلاتها تحبس الخدمة.

وكتقول الراقصة بلي  المشغل ديالها ما تكلفش بمصاريف العلاج ديالها، واضطرات، حسب روايتها، داوا من فلوسها، الشي اللي خلاها تسالي الفلوس لي عندها.

https://www.instagram.com/reel/DbRNkKSJQNk/?igsh=ZHV5dzBscDUweW05

وكتقول الراقصة أن حالتها الصحية، حسب تصريحاتها، كتحتاج لعملية جراحية، وما بقاتش قادرة تخدم ولا توفر مصاريف العلاج ،وضافت أن سفارة الأرجنتين فالمغرب كاتتابع الملف ديالها، لكن الإجراءات الإدارية والقضائية، حسب قولها، مازال كتعطل رجوعها لبلادها، وهو الشي اللي خلاها دير حملة لجمع التبرعات باش توفر ثمن تذكرة السفر، و اللي قالت بلي خاصها على الأقل 1800 يورو.