كريم الصوفي – كود//
خرجات البارح شركة “Meccti” عن صمتها حول فضيحة إجراء مقابلة عمل لشابات باغيين يكونو مضيفات فشركات طيران عالمية غير بالسوتيامات والكيلوطات، لتنفي الواقعة بشكل غير صريح. الشركة علنات أن لأونتروتيان تكلفات بيهم شركة مقرها فالمغرب.
وقررت الشركة إلغاء مقابلات العمل اللي كانت غادي تدار هاذ الشهر ف اسبانيا. الشركة كتواجه إمكانية فتح تحقيق معاها من طرف السلطات الإسبانية المختصة.
القصة نشرها موقع “eldiario.es”، اللي خاذ إفادات من مرشحة حكات الواقعة وكيفاش البنات اللي مشاو يدوزو الأونتروتيان تعرضو للتنمر بالتعليق على مظهرهن الجسدي وتطلب منهن باش يحيدو الحوايج ويبقاو غير بالسوتيامات والكيلوطات، إضافة إلى التمييز على أساس اللون، بحال مرشحة سمرة قالو ليها: “لن نقوم بتوظيف ذوي البشرة الداكنة”.
هاذ المرشحة حكات كيفاش حسات أنها والبنات لي معاها كانو بحال فشي حديقة حيوانات وكلشي كيتفرج فيهم وكان اللي كيحنزز ف الأجساد ديالهم مني حيدو الحوايج وكاين اللي دار السبة ديال كيقلب على واش كاين شي طاطواج ولمس الجسد ديالهم، إضافة إلى اسئلة مستفزة كتعقل بالماكلة..
والبارح نشر موقع قناة”laSexta” ، مقتطفات عن بلاغ للشركة نفات فيه صحة “التصريحات التشهيرية وبالسلوكيات المهينة خلال مقابلات العمل”، لكن ف المقابل رمى البلاغ بالكرة ف مرمى شركة مقرها فالمغرب، تم تكليفها بعمليات انتقاء المضيفات عن طريق التعاقد بالباطن.
موضوعات أخرى
