كود -كازا //

تختارت الشركة المغربية “Air Océan Maroc” باش تكلف بالتغطية الصحية الجوية فنهائيات كأس إفريقيا للأمم، لي غادي تدار فالمغرب من 21 دجنبر حتى 18 يناير الجاي، تحت إشراف وزارة الصحة والحماية الاجتماعية، وبالتنسيق مع الجامعة الملكية المغربية لكرة القدم والكونفدرالية الإفريقية لكرة القدم.

هاد الاختيار جا على حساب التجربة الكبيرة لي عند الشركة فمجال الإسعاف الجوي، والإمكانيات التقنية والبشرية لي عندها، اللي كتشمل أسطول ديال طيارات مجهزة بأحدث المعدات الطبية، وزيد عليها فرق طبية وتمريضية المتخصصة، ولي قادرة تتدخل دغيا وتعالج جميع الحالات المستعجلة.

ومن المتوقع أن طيارات الإسعاف الجوي ديال “Air Océan Maroc” غاتكون ديما فالجاهزية طول مدة البطولة، باش تضمن تدخل سريع وفعال وتنقل المرضى بطريقة مزيانة وفق أعلى المعايير الدولية فمجال الطوارئ الطبية.

هاد الاختيار كيبين الثقة لي كتحظى بها الكفاءات والخبرات المغربية فمجال الخدمات الطبية الجوية، وكيوضح البلاصة المتقدمة لي ولا فيها المغرب فهاد المجال، بزاف من المتابعين كيتمناو تعميم هاد الخدمة حتى على المناطق المعزولة فالجبال خصوصا ف لوقيتة ديال الثلج.