كريم الصوفي – كود//

[email protected]

قامت شركة “Desokupa” الإسبانية المتخصصة في إخلاء العقارات الخاصة بشن حملة إعلامية عدائية ضد رئيس الحكومة، الاشتراكي بيدرو سانشيث، استعدادا للانتخابات التشريعية الإسبانية ف 23 يوليوز القادم.

هاد الشركة دارت لوحة إشهارية كبيرة وسط مدريد واستغلات المغرب والداربو ناسيونال باش تدوز الميساج ديالها. اللافتة تحمل رسالة استفزازية لسانشيث: “أنت في المغرب..  Desokupa  في مونكلوا”، وهي العبارة اللي يفهم منها دعوة الشركة ل سانشيث باش يستقر في المغرب بدلاً من البقاء في قصر مونكلوا، الإقامة الرسمية لرئيس الحكومة.

ومن جانبه، تجاوب حزب العمال الاشتراكي مع الميساج ديال اللوحة الكبيرة، وتمت إدانة الواقعة من طرف المجلس الانتخابي المركزي للحزب، كما أبلغت مصادر حزبية وكالة “أيفي”، بالتفكير  ف تقديم شكوى جنائية ضد لوحة “الكراهية” المعروضة بشارع “Atocha” ف مدريد.

هاد الحملة الدعائية المسمومة كتفرض على وزارة الخارجية المغربية باش تدخل وتخرج بيان على هاد الاستغلال السياسوي والشعبوي لرمز دستوري وطني ف حملة انتخابية ديال بلد جار، خاصة ف ظل تنامي حالة العداء ديال جهات سياسية وإعلامية لكل ما هو مغربي بعد اعتماد خارطة الطريق بين البلدين ف أبريل 2022، واللي وصلات حد اتهام المغرب بمحاولة تزوير الانتخابات البلدية ف سبتة ومليلية..