كود ـ وكالات//

شركة «كافيار» الروسية خرجات بنسخة خاصة ومحدودة من آيفون 17 برو، سميتها Geiger، واللي فيها واحد الخاصية ديال قياس الإشعاع.

التلفون فيه كونتور «جايجر مولر» من نوع SIG RM1208، وكيقدر يقيس مستويات الإشعاع، الشركة وضحات باللي هاد الوحدة ماشي غير تطبيق، ولكن جهاز حقيقي مدموج فالتلفون، وكيقدر حتى يطلق إنذار صوتي إلا فات مستوى الإشعاع واحد الحد اللي كيحددو المستخدم مسبقاً.

«كافيار» بدلات حتى التصميم الخارجي ديال الآيفون، مني عوض الكاركاص بالتيتانيوم، والمعدن.

والأغرب هو أن الشركة دمجات مع عدّاد الإشعاع ساعة حقيقية خدامة بآلية كوارتز السويسرية من نوع Ronda 763.

وبسبب هاد التجهيزات، التلفون ولى كبر وثقل من آيفون 17 برو العادي، خصوصاً مع استعمال التيتانيوم ؤ وحدة قياس الإشعاع والساعة.

«كافيار» قالت باللي غادي تصاوب غير 7 دالنسخ من هاد التلفون، وكل وحدة غادي تاخذ رقم إنتاج خاص محفور فالجسم، ومعاها شهادة الأصالة.

أما الثمن، فالموديل الأساسي اللي فيه 256 جيغابايت كيبدا من 11.780 أورو، مع إمكانية اختيار سعات تخزين أكبر أو نسخة آيفون 17 برو ماكس، بطبيعة الحال بثمن أعلى.